Саша Аўдзевіч зь Ліды сабраўся ў кругасьветнае падарожжа ў 2020 годзе. Наколькі яму вядома, ён першы вазочнік у сьвеце, які мае намер абʼехаць зямны шар.
Старт плянуецца зь Менску 25 сакавіка. Адтуль Саша паедзе ў Кіеў, а потым на ўсход, праз Індыю і Тайлянд у ЗША. Дахаты будзе вяртацца праз Заходнюю Эўропу. Маршрут прыблізны і, магчыма, зьменіцца. Хлопец разьлічвае вандраваць больш за год. У дарозе будзе сам.
Перасоўвацца вазочнік будзе на хэндбайку, тым самым, на якім у 2016 годзе праехаў 4 тысячы кілямэтраў па Эўропе. Пры неабходнасьці Саша паляціць самалётам або паплыве паромам.
Навошта яму гэтыя прыгоды, Аўдзевіч яшчэ не да канца асэнсаваў.
«Хіба стала сумна. Я не магу цяпер асэнсаваць сваю мэту і расказаць. Калі б мог, то не паехаў бы ў падарожжа, а пісаў бы кнігі і прадаваў», — кажа хлопец.
Адначасова ён хоча сваёй кругасьветкай паказаць, наколькі важна, каб у сьвеце была роўнасьць паміж рознымі групамі людзей, у тым ліку людзей з інваліднасьцю.
У дарозе Саша плянуе весьці відэаблог, праводзіць сустрэчы, наведваць офісы ААН, дзе ён цяпер валянтэрыць. Ён падкрэсьлівае, што гэта ягонае асабістае падарожжа, а не піяр-праект, над якім працуе група маркетолягаў.
Пакуль хлопец рыхтуецца ў дарогу. Самае складанае — рыштунак.
«У сьвеце не існуе прыстасаваньняў для падарожжа людзей з інваліднасьцю. Ніхто ня верыць, што гэта магчыма. Я сам усё прыдумляю, замаўляю», — расказвае мужчына.
Ён удасканальвае хэндбайк, бо цяпер дыстанцыя будзе значна большая, чым чатыры гады таму. На гэта трэба некалькі тысяч даляраў. Багаж разам з вазком будзе важыць каля 20 кіляграмаў.
Мама, якая апякуецца сынам з інваліднасьцю, паставілася да задумы скептычна. Сябры ў сацыяльных сетках папярэджваюць пра небясьпекі. Але сам Саша дарогі не баіцца.
«Не сказаў бы, што страшна. Адзінае, што халаднавата будзе ўвесну», — кажа ён.
ГЛЯДЗІЦЕ ТАКСАМА: Самы пазнавальны вазочнік Беларусі скокнуў з парашутам дзеля каханай. ФОТА, ВІДЭА