Беларускі гурт «Крамбамбуля» прадставіў відэа на песьню «Партызаны каляднага лесу», у якой сувора прыгразіў тым, хто «сапсуе калядны настрой».
Песьня прадстаўленая напярэдадні канцэрту пад такой жа назвай — гурт выступіць 21 сьнежня ў менскім Prime hall. У дадатак да канцэрту гурт плянуе на 17 сьнежня гарадзкі квэст з падарункамі ад лідэра гурту Лявона Вольскага.
На тым жа канцэрце «Крамбамбуля» раздасьць узнагароды — самаробныя ордэны і мэдалі — за «простыя чалавечыя дасягненьні на асабістым, сямейным ці працоўным узроўні».
Праз частыя забароны канцэртаў «Крамбамбуля» ў 2015 годзе абвясьціла, што «сыходзіць у лясы», але ўлады раптоўна дазволілі гурту выступаць увесну 2017-га. Утвораны ў 2002 годзе, гурт выдаў 6 студыйных альбомаў, гітамі сталі іх песьні «Госьці», «Турысты», «Абсэнт» ды іншыя.