Лінкі ўнівэрсальнага доступу

Статыстыка пераконвае, што ў выбарчых кампаніях беларускія жанчыны ўдзельнічаюць больш актыўна ў параўнаньні з мужчынамі. Жанчын болей у выбарчых камісіях, сярод назіральнікаў, дый галасуюць яны больш ахвотна за мужчын. Пра жаночую адметнасьць мясцовых выбараў, якія пройдуць 18 лютага 2018 году, — у аглядзе Свабоды.

Няма розьніцы, хто кандыдат – жанчына ці мужчына

У Берасьці старшыня гарадзкой арганізацыі „Беларускай сацыял-дэмакратычнай партыі (Грамада)“ Ганна Канюс вылучаецца кандыдатам у дэпутаты Берасьцейскага гарадзкога савету. Тое, што яна жанчына, не перашкода для выбарчай кампаніі, упэўненая актывістка.

Берасьцейскія кандыдаты ў дэпутаты ад БСДП(Г) Ігар Маслоўскі і Ганна Канюс у 2012 годзе зладзілі пікет «Шукаецца дэпутат»
Берасьцейскія кандыдаты ў дэпутаты ад БСДП(Г) Ігар Маслоўскі і Ганна Канюс у 2012 годзе зладзілі пікет «Шукаецца дэпутат»

«Падчас збору подпісаў зноў пераканалася – людзі не ацэньваюць мяне паводле выгляду, а слухаюць, што я кажу. Шмат хто зусім ня ведае, што такое мясцовае самакіраваньне, што можна ўсталяваць кантроль за ўладай. Мая мэта — даць ім гэты інструмэнт і навучыць карыстацца ім. Бо без асэнсаванага ўдзелу грамадзян у выбарах пераменаў ня будзе», — кажа Ганна Канюс.

Яна ня першы раз выстаўляе сваю кандыдатуру на выбарах. Кажа, што ўжо мае досьвед працы зь людзьмі, і прыгадвае кур’ёзныя выпадкі.

Ганна Канюс, архіўнае фота
Ганна Канюс, архіўнае фота

«На мінулых выбарах насупраць нашага пікету стаяў пікет кандыдата ад улады. Да нас падыходзілі жыхары мікрараёну, размаўлялі з намі, ставілі подпісы, а да праўладнага – не. Аднак калі пад’ехала мясцовае тэлебачаньне і апэратар наладзіў камэру – адразу зьявілася чарга з працаўнікоў рынку. Калі я паспрабавала іх сфатаграфаваць, дык яны пачалі хаваць свае твары», – успамінае Канюс.

Допінг не перашкода, каб ісьці ў дэпутаты

Магілёўская гарадзкая выбарчая камісія зарэгістравала ініцыятыўную групу былой алімпійскай чэмпіёнкі — пазбаўленай мэдаля за допінг Аксаны Мяньковай, перадае БелаПАН.

Аксана Мянькова, архіўнае фота
Аксана Мянькова, архіўнае фота

Кідальніца молата Мянькова, цяпер дырэктар Магілёўскай гарадзкой спартыўнай школы, заваявала залаты мэдаль на летняй алімпіядзе ў Пэкіне ў 2008 годзе. Аднак у 2016 годзе Міжнародны алімпійскі камітэт пазбавіў яе ўзнагароды ў сувязі з ужываньнем забароненых прэпаратаў. Акрамя таго, станоўчы вынік дала і пераправерка допінг-пробы з Алімпійскіх гульняў 2012 году ў Лёндане, дзе Мянькова заняла сёмае месца.

«Я ўжо на ўсё гэта перахварэла і ўжо не хачу камэнтаваць», — заявіла Мянькова агенцтву БелаПАН. Адказваючы на пытаньне, ці не перашкодзіць ёй гэтая сытуацыя стаць дэпутатам гарсавету, былая алімпійская чэмпіёнка сказала: «Людзі будуць галасаваць і глядзець, што і як мы будзем рабіць».

«Я думаю, што, прыйшоўшы ў нашу школу, людзі ўбачаць, што я нямала за год зрабіла. Тут будзе канкурэнцыя, і людзі будуць бачыць, за каго прагаласаваць. Кожны мае права выбару, і мы будзем старацца вырашыць нейкія праблемы, каб наш горад быў яшчэ лепшым», — адзначыла суразмоўца.

Раённае начальства папярэджвае жанчын: ня лезьце ў выбары

Ініцыятарка стварэньня партыі «Жаночая альтэрнатыва» гісторык Ніна Стужынская кажа, што жаночыя актывісткі пакуль абмежаваліся толькі ўдзелам у выбарчых камісіях. А кандыдатамі ў дэпутаты ісьці ня хочуць, каб, як сьцьвярджае спадарыня Стужынская, «не рабіць пустой і дарэмнай справы».

Ніна Стужынская, архіўнае фота
Ніна Стужынская, архіўнае фота

«Сярод нашых актывістак пераважаюць рэгіяналы. Некалькі зь іх распавялі мне аднолькавыя гісторыі. Раённыя кіраўнікі настойліва раяць ім не ісьці ў дэпутаты. Маўляў, усё ўжо разьмеркавана і ня псуйце нашыя пляны. Праводзьце свае дабрачынныя, культурныя, асьветніцкія акцыі, і мы вам дапаможам у гэтым. Але не ідзіце на выбары», — тлумачыць яна.

Паводле Стужынскай, з гэтага можна зрабіць скандал. Але ці патрэбен ён?

«У такой сытуацыі, мабыць, лепей устрымацца. Я нядаўна глядзела адну перадачу на расейскім канале „Дождь“. Там таксама пра выбары гаварылі. І пачула такія словы: „Давайце захаваем сілы, здароўе і саміх сябе“», — згадвае Стужынская.

Яна лічыць, што будзе больш карысьці ад стварэньня моцнай падрыхтаванай жаночай групы, чым ад балятаваньня ў дэпутаты мясцовых саветаў.

Дэмакратычную актывістку не ўключылі ў камісію за пікет 16-гадовай даўніны

У Бярозе на Берасьцейшчыне ў раённую выбарчую камісію спрабавала патрапіць мясцовая жыхарка Тамара Шчапёткіна. Яна сабрала неабходную колькасьць подпісаў выбарнікаў. Аднак ва ўключэньні ў камісію Шчапёткінай адмовілі.

Тамара Шчапёткіна ў залі суду, архіўнае фота
Тамара Шчапёткіна ў залі суду, архіўнае фота

«Афіцыйнага тлумачэньня адмовы мне не далі. Але ў размове не забыліся ўзгадаць, што мяне прыцягвалі да адміністрацыйнай адказнасьці за несанкцыянаваную акцыю. Так, такі выпадак сапраўды быў. Але ажно ў 2001 годзе», — гаворыць Шчапёткіна.

Яна зьбіраецца абскарджваць адпаведнае рашэньне: тэрмін адказнасьці даўно прайшоў.

Спадарыня Шчапёткіна кажа, што ў Бярозе шмат жанчын традыцыйна ўдзельнічаюць ў выбарчых камісіях. Але гэта — прызначэнцы ўлады.

Старшыні сельсавету не хапае часу на агароды

У Магілёўскім раёне ў дзесяці зь пятнаццаці сельсаветаў старшынююць жанчыны. Некаторыя працуюць на гэтай пасадзе не адну дэпутацкую кадэнцыю.

«Жанчыны больш актыўныя, адказныя і ініцыятыўныя», – так тлумачыць гендэрную няроўнасьць старшыня Дашкаўскага сельсавету Сьвятлана Кузьмянкова.

Яна лічыць: жанчына больш уважлівая да людзкога клопату і здольная даць яму рады, асабліва калі ён бытавога характару.

Каміль Пісаро, «Агарод мастака ў Эрані» (1898), ілюстрацыйная выява
Каміль Пісаро, «Агарод мастака ў Эрані» (1898), ілюстрацыйная выява

«Жанчына больш дэталёва разьбіраецца з праблемай. Мужчын часам на гэта не хапае. Яны не зьвяртаюць увагі на дробязі. Жанчына ж наадварот. Яна штодзённа жыве з бытавым клопатам. Ведае яго прыроду, бо на ёй хатнія праблемы. Таму жанчыны і апынуліся бліжэй да патрэбаў грамадзян», — так бачыць сытуацыю Кузьмянкова.

Яна зьбіраецца стаць дэпутатам і на наступны тэрмін. На пытаньне, ці хапае часу на агарод, дэпутатка прызналася, што ён адышоў на апошняе месца:

«У мяне муж і трое сыноў. І мы разам стараемся агарод прыгледзець, але, як хацелася б, не выходзіць. Праблема з часам. Мы заўсёды загружаныя».

Ваша меркаваньне

Паказаць камэнтары

XS
SM
MD
LG