Лінкі ўнівэрсальнага доступу

Вольскага ня будзе на менскім канцэрце #БНР100 фізычна. Але будзе тэлемост


Лявон Вольскі, архіўнае фота

Беларускі сьпявак Лявон Вольскі ня зможа выступіць на менскім «Сьвяце Незалежнасьці» 25 сакавіка, піша ён на Facebook. Але ён хацеў бы выступіць, спадзяецца на тэлемост з Польшчы.

Як тлумачыць Лявон Вольскі, яшчэ летам мінулага году ён прыняў прапанову выступіць на канцэрце да 100-годзьдзя абвяшчэньня незалежнасьці Беларускай Народнай Рэспублікі ў польскім Беластоку. Маўляў, тады цяжка было ўявіць, каб улады дазволілі ў Беларусі канцэрт на Дзень Волі.

І як бы яму не хацелася выступіць на сьвяце ў Менску, Вольскі абавязаны быць на сцэне ў Беластоку а 18-й гадзіне паводле менскага часу (17-й па Варшаве), а канцэрт ля менскай Опэры пачнецца толькі а 14-й — даехаць пасьля выступу ён проста не пасьпее.

«Не такая вялікая падзея, каб мяняць нашыя пляны», — арганізатар Беластоцкага канцэрту пра тое, чаму Вольскі ня выступіць у Менску

Прэзэнтацыя альбому Лявона Вольскага «Псыхасаматыка» ў Вільні, 2016 год
Прэзэнтацыя альбому Лявона Вольскага «Псыхасаматыка» ў Вільні, 2016 год

«Разам з арганізатарамі сьвята каля Опэрнага мы абмяркоўвалі нават варыянт з гелікоптэрам, але міжнароднага аэрапорту ў Беластоку няма, а з Варшавы ці Гародні даехаць ізноў не пасьпяваю, — піша Вольскі. — Таму я засьпяваю ў Менску ў варыянце тэлемоста. Адбудзецца прэзэнтацыя маёй песьні, прысьвечанай 100-годзьдзю абвяшчэньня БНР.

Я разумею, што гэта ня тое самае, што быць на гэтым канцэрце асабіста, але, перабраўшы ўсе варыянты, хачу ўзяць удзел хаця б такім чынам. Бо гэта наша агульнае сьвята і нават такія абставіны ня мусяць нас разьяднаць у гэты дзень. Мы працягваем шукаць іншыя варыянты выступіць у Беларусі ў межах сьвята і калі іх знойдзем, абавязкова паведамім вам».

Хто выступіць на «Сьвяце незалежнасьці» ў Менску. Фінальная афіша #БНР100 плюс ВІДЭА

На плятформе Talaka.by арганізатарам менскага канцэрту сабралі на момант публікацыі 87% неабходных сродкаў (ёсьць таксама іншыя шляхі ахвяраваньняў).

Мітынгі-канцэрты 25 сакавіка ўжо таксама дазволеныя ў Берасьці (там маюць выступіць гурты :B:N:, Re1ikt і іншыя) і Горадні (туды запрасілі N.R.M., вядуць збор грошай на канцэрт), дазволаў чакаюць у яшчэ некалькіх гарадах.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG