Пры гэтым расьце занепакоенасьць тым, што прэзыдэнт Расеі Ўладзімір Пуцін можа нанесьці ўдар па балтыйскай краіне або іншай дзяржаве NATO, каб праверыць рашучасьць заходняга альянсу, піша Радыё Свабодная Эўропа / Радыё Свабода.
27 жніўня Трамп заявіў журналістам у Авальным кабінэце, што ён правёў «добрыя перамовы» з Пуціным і што апошні «не зьбіраецца атакаваць тэрыторыю NATO».
Ён не ўдакладніў, калі адбыліся гэтыя перамовы.
«Я зусім не хвалююся... Няма праблем», — працытавала выданьне Axios адказ Трампа на пытаньне пра магчымую расейскую правакацыю супраць дзяржавы NATO.
Гэтыя асьцярогі ўзмацніліся пасьля нечаканага візыту дырэктара ЦРУ ў Маскву.
Гарантыі чальцам NATO паводле артыкулу 5 дамовы аб альянсе
Бясьпека Заходняй Эўропы даўно зьвязана з артыкулам 5 дамовы NATO, які абвяшчае, што напад на адну з краін-сяброў ёсьць нападам на ўсіх. Многія заходнія лідэры і службоўцы выказвалі занепакоенасьць наконт прыхільнасьці Трампа вайсковаму альянсу. Трамп часам ставіў пад сумнеў рэакцыю ЗША на такі магчымы напад, а часам пацьвярджаў падтрымку NATO магчымай ахвяры нападу.
Ліст, зь якім азнаёмілася Радыё Свабодная Эўропа / Радыё Свабода, сьведчыць пра рост занепакоенасьці магчымай агрэсіяй Расеі супраць краінаў Балтыі. У ім гаворыцца пра «пагаршэньне абставінаў з гледзішча бясьпекі» пры «часьцейшых парушэньнях паветранай прасторы і ўварваньнях дронаў».
Ліст накіраваны прэзыдэнтцы Эўрапейскай камісіі Урзулі фон дэр Ляен, яго падпісалі тры эўракамісары ад краін Балтыі: Кая Калас, Андрус Кубілюс і Валдыс Домбраўскіс, а таксама камісары ад Польшчы і Фінляндыі.
Ліст ад 30 ліпеня быў адным з чарады трывожных званкоў, а пікам стаў нечаканы візыт дырэктара ЦРУ Джона Рэткліфа ў Маскву 25 жніўня. Рэткліф прыляцеў у Маскву, каб заклікаць Крэмль не дапускаць эскаляцыі канфліктаў з саюзьнікамі ЗША, асабліва з Эстоніяй, Латвіяй і Літвой — крыніцы, якія атрымалі інфармацыю пра візыт, пацьвердзілі гэта Радыё Свабодная Эўропа / Радыё Свабода 26 жніўня.
Але Axios цытуе Трампа, які адмаўляе, што Рэткліф рабіў такое папярэджаньне расейцам.
«Рэткліф бачыць свайго расейскага калегу раз на шэсьць месяцаў або раз на год. У іх вельмі добрыя адносіны. Ніякага пасланьня не было і нічога незвычайнага не было», — сказаў Трамп.
Але калі пазьней журналісты ў Авальным кабінэце спыталі яго пра гэта, Трамп, як выглядала, адступіў, сказаўшы:
«Я не хачу гэтага камэнтаваць, але яны не зьбіраюцца нападаць [на NATO]».
The New York Times з спасылкай на цяперашніх і былых службоўцаў паведаміла, што Рэткліф выказаў свайму калегу змрочную ацэнку стану вайны Расеі супраць Украіны і заклікаў Крэмль дасягнуць угоды, перш чым ваенная і эканамічная сытуацыя ў краіне пагоршыцца.
Газэта The Wall Street Journal 6 жніўня працытавала зьвесткі амэрыканскай выведкі аб тым, што Расея можа праверыць рашучасьць NATO абмежаваным уварваньнем ужо гэтай восеньню. Балтыйскія дыпляматы, якія пагаварылі з Радыё Свабодная Эўропа / Радыё Свабода на ўмовах ананімнасьці, пацьвердзілі, што летам былі атрыманыя дадатковыя зьвесткі выведкі аб расейскіх апэрацыях пад фальшывым сьцягам, але не было ніякіх прыкметаў рыхтаваньня немінучай канвэнцыйнай атакі.
Ціск на чальцоў NATO
Адначасова 27 жніўня высокі службовец Пэнтагону заклікаў хаўрусьнікаў у NATO растлумачыць, як яны рэагуюць на патрабаваньні ЗША ўзяць на сябе большую адказнасьць за абарону Эўропы, бо Вашынгтон пераглядае ўзровень сваіх сілаў на кантынэнце.
