Лінкі ўнівэрсальнага доступу

Трамп: Злучаныя Штаты Амэрыкі мусяць ладзіць з Расеяй


Уладзімер Пуцін і Дональд Трамп на сустрэчы ў Гамбургу, 7 ліпеня 2017 году

Прэзыдэнт ЗША Дональд Трамп паўтарыў свае папярэднія выказваньні, што Вашынгтон павінен мець лепшыя адносіны з Масквой, і адмовіўся апісаць дзеяньні Расеі ў Эўропе ў апошнія гады як пагрозу.

28 жніўня на сумеснай прэс-канфэрэнцыі зь фінскім прэзыдэнтам Саўлі Нійністэ фінскія журналісты спыталі Трампа, ці лічыць ён Расію пагрозай.

«Я, на жаль, лічу многія краіны пагрозай бясьпецы. Я б разглядаў пагрозы з боку многіх краінаў, але гэта ўсё пагрозы, зь якімі мы зможам справіцца, калі гэта спатрэбіцца», — сказаў Трамп.

Адказваючы на пытаньне аб сумесных вайсковых вучэньняў, праведзеных Расеяй і Кітаем у Балтыйскім моры, і заплянаваных на верасень вучэньняў побач з краінамі Балтыі, прэзыдэнт ЗША адказаў, што «мы вельмі абараняем гэты рэгіён». Пра Расею Трамп таксама сказаў, што «гэта вялікая краіна, ядзерная краіна, гэта краіна, зь якой мы мусім ладзіць».

Трамп 2 жніўня падпісаў закон аб увядзеньні новых санкцый у дачыненьні да Расеі. У камэнтары, распаўсюджаным Белым домам, гаварылася, што Трамп бачыць сур'ёзныя хібы ў гэтым законе, але падпісвае яго дзеля нацыянальнага адзінства.

Сэнат ЗША 27 ліпеня прагаласаваў у падтрымку новых санкцый супраць Расеі. Абмежаваньні таксама тычацца Паўночнай Карэі і Ірану. Дакумэнт быў ухвалены абедзьвюма палатамі Кангрэсу ЗША амаль аднагалосна, нягледзячы на пратэсты Белага дома і яго скаргі, што Кангрэс пазбаўляе дзейнага прэзыдэнта магчымасьці ажыцьцяўляць эфэктыўную замежную палітыку.

Узгодненае рашэньне заканадаўцаў ад абедзьвюх партый у пытаньні аб санкцыях фактычна пазбавіла Трампа магчымасьці скарыстацца правам вэта, на пераадоленьне якога патрабуецца дзьве траціны галасоў членаў Кангрэсу.

Ваша меркаваньне

Паказаць камэнтары

XS
SM
MD
LG