Лінкі ўнівэрсальнага доступу

Беларускі антыракавы прэпарат выходзіць на фармацэўтычны рынак Эўразьвязу


Швэдзкая фармакампанія Double Bond Pharmaceutical International, якая распрацоўвае і прадае інавацыйныя лекі супраць раку, інфэкцый, аўтаімунных захворваньняў ды іншых небясьпечных для жыцьця хваробаў, рыхтуецца да выпуску на рынкі ЭЗ беларускай вынаходкі Тэмадэкс (Temodex).

Прэпарат, у аснове якога ляжыць дзейнае рэчыва тэмазаламід, прызначаны для лячэньня злаякаснай пухліны галоўнага мозгу. Ён быў створаны некалькі год таму навукоўцамі зь лябараторыі структурна-хімічнай мадыфікацыі поліцукрыдаў у інстытуце фізыка-хімічных праблем Белдзяржунівэрсытэту.

Як паказалі праведзеныя ў Беларусі клінічныя выпрабаваньні, выкарыстаньне Тэмадэкса павышае працягласьць жыцьця анкалягічных хворых, да таго ж яно істотна менш траўматычнае для арганізму, чым вядомыя дагэтуль прэпараты, і забясьпечвае пацыента вышэйшай якасьцю жыцьця. Кошт беларускага мэдыкамэнту — крыху больш за 300 даляраў, у той час як цана амэрыканскіх лекаў падобнага кшталту, але зробленых па іншай тэхналёгіі, даходзіць да 20 000 даляраў. Тэмадэкс, які ўжо пачалі выкарыстоўваць у клінічных установах Беларусі, празь некаторы час зьявіцца ў шпіталях Швэцыі і іншых краін ЭЗ. Першая партыя лекаў у Эўропе выйдзе пад працоўнай назвай СА-033.

Міты і праўда пра рак. Эксклюзіўнае інтэрвію дырэктара анкалягічнага цэнтру ў Бараўлянах

Вядучы адмысловец кампаніі па пытаньнях якасьці лекаў Саех Эрфан тлумачыць зьмену назвы тым, што беларусы вырабілі мэдыкамэнт у адпаведнасьці са стандартамі сваёй краіны, якія адрозьніваюцца ад стандартаў ЭЗ. Акрамя таго, у фірмы ёсьць пляны вырабляць у будучыні і СІ-053, зь іншай колькасьцю дзейнага антыпухліннага рэчыва. Мяркуецца, што гэта будзе спрыяць больш дакладнаму лячэньню з улікам індывідуальных патрэб пацыента.

«Вельмі важна, што мы маем яснасьць адносна крыніцы, канцэнтрацыі і якасьці гэтага лекавага сродку», — кажа Саех Эрфан.

Правы на Tэмадэкс Double Bond Pharmaceutical International набыла яшчэ ў кастрычніку 2015 году, пераканаўшыся, што гэты мэдыкамэнт зробіць прарыў у дапамозе хворым на рак галаўнога мозгу.

Сутнасьць вынаходкі беларускіх навукоўцаў у тым, што асноўнае актыўнае рэчыва антыпухліннага прэпарату-цытастатыку цяпер мае іншую субстанцыю. Гэта ўжо не іньекцыі, а гель, які ўводзіцца пасьля хірургічнага ўмяшаньня лякальна ў мозг і замацоўваецца там каля патрэбнага месца. Адрозна ад раствору, гель не разыходзіцца па ўсім арганізьме, хімія не забівае разам з ракавымі і здаровыя клеткі, таксычныя рэчывы выводзяцца з арганізму значна лепш. Акрамя таго, лячэньне Тэмадэксам патрабуе ў якасьці дадатку толькі хімія-прамянёвай тэрапіі. Згодна з ранейшымі пратаколамі, хворым трэба было яшчэ правесьці і хіміятэрапію.

Фармакампанія Double Bond Pharmaceutical International — першая і пакуль адзіная, зь якой падпісалі ліцэнзійны кантракт беларускія распрацоўшчыкі. Для таго каб самім вытворцам прадаваць сваю прадукцыю на рынках іншых краін, яны мусілі б за свае сродкі праводзіць клінічныя выпрабаваньні па-за межамі Беларусі. У распрацоўшчыкаў такіх грошай няма. А швэды аплацілі выдаткі на клінічныя выпрабаваньні ў Эўропе ў адпаведнасьці са стандартамі ЭЗ.

«Галоўны міт: рак — гэта сьмерць». Правілы жыцьця трох анкапацыентак

Ваша меркаваньне

Паказаць камэнтары

XS
SM
MD
LG