Лінкі ўнівэрсальнага доступу

ЗША заявілі аб скарачэньні бюджэту ААН больш чым на 285 мільёнаў даляраў


Сталы прадстаўнік ЗША пры ААН Нікі Хэйлі

Злучаныя Штаты заяўляюць аб ўзгадненьні скарачэньня бюджэту ААН на 2018-2019 гады на суму больш чым 285 мільёнаў даляраў.

«У дадатак да такой значнай эканоміі сродкаў, мы скарацілі разьдзьмутыя функцыі кіраваньня і падтрымкі ў ААН», — гаворыцца ў афіцыйнай заяве сталага прадстаўніка ЗША пры ААН Нікі Хэйлі.

У заяве не пазначаная ўся сума бюджэту арганізацыі і не пазначана, як гэта паўплывае на ўнёскі ЗША. Паводле The New York Times, згодна з формулай, прывязанай да памераў эканомікі і іншых вымярэньняў, устаноўленых у адпаведнаьсці з артыкулам Статуту ААН, Злучаныя Штаты адказныя за 22 адсоткі ад дзейнага бюджэту Арганізацыі Аб’яднаных Нацый. У 2016-2017 гадах ЗША заплацілі каля 1,2 млрд даляраў з агульнага бюджэту ААН 5,4 млрд даляраў.

Нікі Хэйлі заявіла, што «неэфэктыўнасьць і перарасход» арганізацыі добра вядомыя, і Вашынгтон не дазволіць «выкарыстоўваць шчодрасьць амэрыканскага народа».

«Гэта гістарычнае скарачэньне выдаткаў — у дадатак да шматлікіх іншых крокаў вядзе да больш эфэктыўнасьці і падсправаздачнасьці ААН — гэта вялікі крок у правільным кірунку», — заявіла Хэйлі.

Яна таксама сказала, што, хоць місія ЗША пры ААН задаволеная вынікамі бюджэтных перамоваў, яна будзе працягваць «шукаць шляхі павышэньня эфэктыўнасьці ААН, абараняючы нашы (ЗША — РС) інтарэсы».

Раней прэзыдэнт ЗША Дональд Трамп прыгразіў, што паменшыць фінансавую дапамогу краінам, якія прагаласуюць за рэзалюцыю ААН, якая асуджае прызнаньне Вашынгтонам Ерусаліму сталіцай Ізраілю. «Яны бяруць сотні мільёнаў даляраў і нават мільярды даляраў, а потым галасуюць супраць нас. Што ж, мы сочым за гэтымі галасамі. Няхай галасуюць супраць нас. Мы зэканомім нямала. Нам усё роўна», — заявіў Трамп перад журналістамі ў Белым доме.

21 сьнежня Генасамблея ААН прыняла рэзалюцыю, што абвясьціла несапраўдным рашэньне ЗША прызнаць Ерусалім сталіцай Ізраілю і асудзіла Трампа перанесьці ў гэты горад амэрыканскую амбасаду.

За рэзалюцыю прагаласавала пераважная большасьць краінаў-удзельніц ААН — 128. Дзевяць краін выказаліся супраць, 35 краін устрымаліся. Беларусь галасавала ў падтрымку рэзалюцыі.

Ваша меркаваньне

Паказаць камэнтары

XS
SM
MD
LG