Лінкі ўнівэрсальнага доступу

Пэтыцыю «За міліцыю для ўсіх» падпісалі больш за 1500 чалавек


Вясёлкавы сьцяг над амбасадай ЗША ў Менску — МУС крытыкавала за такі сьцяг толькі амбасаду Вялікай Брытаніі, але «не заўважыла» сьцяг на амбасадзе ЗША

На сайце Petitions.by ідзе збор подпісаў супраць «гамафобнай заявы» Міністэрства ўнутраных справаў. Празь пяць дзён пэтыцыю маюць адаслаць у Генэральную пракуратуру і МУС. На момант публікацыі яе падпісалі 1500 чалавек.

У тэксьце пэтыцыі нагадваюць, што Канстытуцыя Беларусі называе правы і свабоды чалавека найвышэйшай каштоўнасьцю дзяржавы незалежна ад сэксуальнай арыентацыі, а законы не замацоўваюць за праваахоўнікамі права выступаць з «ідэалягічнымі камэнтарамі» і даваць «неправавыя ацэнкі» сытуацыям, не зьвязаным зь іхнымі прамымі абавязкамі.

Таксама ў пэтыцыі нагадваюць, што «гамафобная заява» – не адзіны выпадак няроўнага падыходу да людзей на сайце МУС: згадваецца «распальваньне варожасьці да цыганоў» (сапраўды, у артыкулах на сайце МУС і іншых сайтах праваахоўнікаў нярэдка цыганы прыраўноўваюцца да злачынцаў – у фразах накшталт «участковы папярэдзіў аб небясьпецы кантактаў з цыганамі»).

Падпісанты пэтыцыі патрабуюць праверыць законнасьць такіх выказваньняў, прыбраць «гамафобную заяву» з сайту МУС і «надалей устрымацца ад камэнтароў такога зьместу, дзе адмаўляецца абавязак абараняць жыцьцё, здароўе, гонар, годнасьць, правы, свабоды і законныя інтарэсы грамадзянаў».

У ананімнай заяве «Мы за сапраўднае», што зьявілася на сайце МУС 20 траўня, сьцьвярджаецца, што «аднаполыя адносіны – гэта падробка» і што «ЛГБТ-супольнасьць, і ўся гэтая барацьба за «свае правы», і сам дзень супольнасьці – усяго толькі падробка». Заява завяршанецца словамі «яны ня пройдуць», адрасаванымі ЛГБТ-супольнасьці.

Прычынай заявы стала тое, што ў Міжнародны дзень барацьбы з гамафобіяй, амбасада Вялікай Брытаніі ў Менску вывесіла вясёлкавы сьцяг — міжнародны сымбаль ЛГБТ-супольнасьці. «Гамафобная заява» МУС ужо трапіла ў брытанскія СМІ. BBC і The Telegraph у матэрыялах пра заяву нагадалі, што Аляксандар Лукашэнка ў 2012 годзе заявіў: «Лепей быць дыктатарам, чым геем».

Міністар унутраных справаў Ігар Шуневіч заявіў наконт публікацыі, што «не рэагаваць на падобнага кшталту падзеі мы ня маем ніякага права», бо «гэта ўнутраная справа, у тым ліку нашага міністэрства».

«Мяне пасадзяць? Заб’юць?» — прадстаўнікі ЛГБТ-супольнасьці адрэагавалі на заяву МУС
пачакайце

No media source currently available

0:00 0:02:07 0:00

Беларусь апынулася на 42-м месцы з 49 краінаў Эўропы паводле ўзроўню гамафобіі. Гэта вынікае са штогадовай справаздачы міжнароднай арганізацыі ILGA-Europe. Сярод краінаў Эўропы горш, чым у Беларусі, сытуацыя выглядае толькі ў Малдове, Сан-Марына, Расеі, Манака, Турэччыне, Армэніі і Азэрбайджане.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG