Маладафронтаўца, абаронцу Курапатаў Сяргея Пальчэўскага 10 сакавіка вызвалілі з турмы на Акрэсьціна, дзе ён адбываў трое сутак адміністрацыйнага арышту.
«Каля 15 гадзіны мяне вывезьлі з ізалятара на Акрэсьціна і прывезьлі ў Першамайскі РАУС, і потым выпусьцілі. Я пайшоў дахаты пехатой, я тут недалёка жыву», — сказаў Сяргей Пальчэўскі карэспандэнту Свабоды.
Сяргей Пальчэўскі апавёў, як яго затрымалі:
— Зайшоў у падʼезд, і каля дзьвярэй мяне чакалі двое ў цывільным. Яны паказалі свае міліцэйскія пасьведчаньні і сказалі, што трэба зь імі праехаць. Спачатку мяне завезьлі ў Савецкі РАУС, а адтуль у Першамайскі суд. Там мне прысудзілі трое сутак па чатырох артыкулах. Адзін зь іх быў за ўдзел у «Маршы недармаедаў». А тры — за Курапаты. Яшчэ быў артыкул за хуліганства, але па ім мяне апраўдалі. Потым недзе каля дзьвюх гадзін езьдзілі па горадзе, пакуль мяне не завезьлі ў спэцпрыёмнік на Акрэсьціна.
— А ў чым вінавацілі за Курапаты?
— Абвінавацілі ва ўдзеле ў несанкцыянаваным мерапрыемстве, за тое, што я прыкаваўся да МАЗа, і за ўдзел у мітынгу, які быў у лягеры абаронцаў Курапатаў.
— Суд адбываўся так, што пра яго ніхто ня ведаў? У цябе была магчымасьць патэлефанаваць сваякам, сябрам?
— Такой магчымасьці не далі. Я і пасьля суду казаў — дайце патэлефанаваць маці. Але мне не далі патэлефанаваць ні ў пастарунку, ні ў судзе, ні на Акрэсьціна. Але ўсё адбывалася вельмі хутка. Мне перадалі перадачу, адзін раз вывелі на прагулку. А ўначы каля чацьвёртай гадзіны вызваляўся адзін чалавек, і я сказаў мой хатні нумар, папрасіў, каб патэлефанаваў маме і сказаў, што мне далі трое сутак. Перадаў, у колькі мяне вызваляюць, мяне павінны былі вызваліць у 16:15.
— Чым выклікана такая рэакцыя ўладаў: затрыманьне, хуткі суд, адсутнасьць інфармацыі?
— Відаць, я займеў ужо такую вядомасьць, і яны не хацелі, каб быў вялікі розгалас у СМІ. Таму так хутка дзейнічалі. Таксама для мяне дзіўна, што далі трое сутак. Я разумею, што так дзёрзка дзейнічалі падчас абароны Курапатаў, і ўлады не маглі гэта так проста прапусьціць, трэба было неяк пакараць. Але зь нейкіх прычын ад лібэралізацыі таксама ня могуць адмовіцца. Таму вось толькі трое сутак.
