Лінкі ўнівэрсальнага доступу

Малчанаў: Я разумею, што тут, ва Ўкраіне, мне КДБ-шнікі нічога не змогуць зрабіць


Аляксандар Малчанаў

Вязень Плошчы, барысаўчанін Аляксандар Малчанаў, які пэўны час знаходзіўся ва Ўкраіне ў зоне АТА, паведаміў, што супраць яго ў Беларусі пачатая крымінальная справа за наёмніцтва.

«Крута, цяпер я магу сябе лічыць паўнавартасным баевіком-наймітам. Гучыць магутна», — напісаў ён на сваёй старонцы ў фэйсбуку.

Ці насамрэч гэта справа пачатая і як бачыць Аляксандар Малчанаў свае пэрспэктывы, ён распавёў у інтэрвію карэспандэнту Свабоды.

— Аляксандар, як вы даведаліся, што супраць вас пачатая справа?

— Хто менавіта паведаміў, я не магу сказаць, бо ў іх могуць быць пэўныя праблемы, бо яны знаходзяцца ў Беларусі. Але я маю зносіны з шэрагам суайчыньнікаў праз інтэрнэт і тэлефон. Да мяне дайшлі зьвесткі, што, напрыклад, каля месяца таму да пакупнікоў майго дома, які я прадаў у Барысаве, прыяжджалі нейкія супрацоўнікі КДБ і гутарылі зь імі пра мяне. Хаця падрабязнасьцяў гэтай размовы я ня ведаю. Я думаю, што якраз пра тое, чым я займаюся ва Ўкраіне.

Я, аднак, ня ведаю, чаго яны хацелі ад пакупнікоў, бо я зь імі на гэтыя тэмы не размаўляў. У прынцыпе, нічога карыснага яны не маглі ім сказаць. Відаць, на ўсялякі выпадак апыталі.

Таксама некаторых маіх знаёмых і даволі блізкіх людзей: альбо іх выклікалі ў КДБ, альбо прыходзілі да іх проста на працу. Пыталіся, у тым ліку, калі я прыяжджаў у Беларусь, ці не паказваў ім якія фатаздымкі з фронту, ці не прывозіў зброю, ці не плянаваў я нешта ў Беларусі. Таксама задавалі многія іншыя пытаньні пра мае дзеяньні ва Ўкраіне.

— Ці вы адчуваеце цяпер сябе ў бясьпецы?

— Мне ўсё роўна. Калі я апошні раз адʼяжджаў зь Беларусі, я разумеў, што так ці інакш на мяне там будзе заведзена куча крымінальных спраў. І ня важна, артыкул «найміцтва» ці які іншы. Я разумею, што тут, ва Ўкраіне, мне КДБ-шнікі нічога ня змогуць зрабіць. І было б нават забаўна паглядзець, каб сюды якая група прыехала і паспрабавала, Натуральна, праблемы былі б толькі ў іх, і вельмі сурʼёзныя.

— Вы маеце ўжо грамадзянства Ўкраіны?

— Грамадзянства ў мяне беларускае. І ў сувязі з гэтым маю тут ва Ўкраіне пэўныя складанасьці. У мяне ёсьць від на жыхарства, мне цяжка зь ім недзе афіцыйна працаўладкавацца, таму цяпер працую грузчыкам на адным з рынкаў Кіева.

— Натуральна, вяртацца ў Беларусь вы не зьбіраецеся...

— Цяпер, я разумею, калі я прыеду — гэта адразу тэрмін, і значны. То бок пакуль у Беларусі не памяняецца сытуацыя, я думаю, мне там лепш не зьяўляцца.

Таму пакуль цяпер на фронце ціха, спрабую, калі не адновяцца баявыя дзеяньні, неяк уладкавацца ў Кіеве. Хутка дабудуюць мой дом, то бок буду неяк спрабаваць зарабіць грошай на рамонт.

— Як вы ставіцеся да перасьледу ў Беларусі беларусаў, якія ваююць на ўкраінскім баку?

— Гэта было адпачатку прадказальна, што патрыёты Беларусі для іх — гэта першыя ворагі. То бок пакуль ля ўлады знаходзіцца Лукашэнка, зразумела, што такое будзе, і было б дзіўна, калі б гэтага не было. Усё чакана.

Паводле МУС Беларусі, у сьледчыя органы перададзена ўжо 28 спраў, якія тычацца прыкладна 130 беларусаў, якія бяруць удзел ва ўкраінскім канфлікце.

Ігар Лосік Кацярына Андрэева Ірына Слаўнікава Марына Золатава Ягор Марціновіч

Самае папулярнае

XS
SM
MD
LG