Лінкі ўнівэрсальнага доступу

У Слуцку на канцэрце #БНР100 выступяць Алесь Дзянісаў і Зьміцер Бартосік


Аліна Нагорная, арганізатарка канцэрту
Аліна Нагорная, арганізатарка канцэрту

Канцэрт, прысьвечаны 100-й гадавіне абвяшчэньня незалежнасьці Беларускай Народнай Рэспублікі, пройдзе ў слуцкім гарадзкім Доме культуры 25 сакавіка ад 12:30, сказала Свабодзе арганізатарка імпрэзы, сябра руху «Дзея» Аліна Нагорная.

На канцэрце выступяць бард і пісьменьнік, аўтар перадачы «Падарожжы Свабоды» Зьміцер Бартосік, а таксама сьпявак Алесь Дзянісаў, вядомы па гуртах «Кальян», «Людзі на балоце» і Dzieciuki. Пры гэтым гурт Dzieciuki выступіць у той жа дзень у Менску на «Сьвяце незалежнасьці». Вядуцца перамовы зь яшчэ адным музычным гуртом.

Заля ДК зьмяшчае да 500 чалавек. Паводле Аліны Нагорнай, мясцовы выканкам і адміністрацыя ДК «паставілі вельмі добрыя ўмовы», у тым ліку нізкія цэны на арэнду памяшканьня.

Цяпер арганізатары зьбіраюць грошы на сайце Talaka.by на арганізацыйныя выдаткі і транспарт, з патрэбных 1500 рублёў сабрана на момант публікацыі каля 250. Грошы на канцэрты ў межах кампаніі #БНР100 зьбіраюцца таксама ў Менску (сабрана 100%, «лішнія» грошы, калі такія будуць, перанакіруюць у рэгіёны), Берасьці і Горадні (па 27%). Як кажа Нагорная, калі застануцца «лішнія» грошы ад слуцкага краўдфандынгу, іх накіруюць на стварэньне сайту пра Слуцкі збройны чын.

Мітынгі, канцэрты, вечарыны і іншыя імпрэзы ў межах #БНР100 заплянаваныя яшчэ ў дзясятках гарадоў у Беларусі і за мяжой. Шмат дзе беларускія ўлады ня чыняць перашкодаў у сьвяткаваньні. Але ўлады Менску забаранілі ўсе шэсьці, дазволіўшы канцэрт, і затрымалі ініцыятараў шэсьця.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG