Прэзыдэнт Турэччыны Рэджэп Таіп Эрдаган заклікаў краіны сьвету прызнаць «акупаваны Ерусалім» сталіцай Палестыны ў адказ на прызнаньне гораду Злучанымі Штатамі сталіцай Ізраілю, перадае Reuters.
Да закліку Эрдагана, як перадае BBC, далучыліся лідэры іншых мусульманскіх краінаў — усяго 57 краінаў на саміце Арганізацыі ісламскай супрацы заклікалі прызнаць Усходны Ерусалім «акупаванай сталіцай Палестыны».
Цяпер Ерусалім пад кантролем Ізраілю, але большасьць краінаў сьвету не прызнае горад сталіцай Ізраілю — на горад прэтэндуе таксама Палестына, у горадзе разьмешчаныя ня толькі юдэйскія сьвятыні, але і мусульманскія, і хрысьціянскія. Да 1967 году Ізраіль прызнаваў праўленьне Іярданіі ва Усходнім Ерусаліме (у тым ліку Старым горадзе), але пасьля перамогі ў «Шасьцідзённай вайне» Ізраіль заявіў пра кантроль над цэлым горадам.
Эрдаган на саміце Арганізацыі ісламскай супрацы таксама заявіў, што Ерусалім — «чырвоная лінія» для мусульманаў, якія не пацерпяць «ніякай агрэсіі на ісламскіх сьвятынях». ЗША, казаў ён, цяпер «неаб’ектыўныя», таму ня могуць быць пасярэднікам у араба-ізраільскім канфлікце — Эрдаган прапануе знайсьці «новага пасярэдніка» ў тым ліку праз ААН.
Рашэньне Дональда Трампа пра Ерусалім крытыкавалі ў тым ліку лідэр Палестынскай аўтаноміі Махмуд Абас, прэзыдэнт Ірану Хасан Рухані, кароль Іярданіі Абдула. Кіраўнік ХАМАСу тыдзень таму заклікаў палестынцаў да новага паўстаньня ў Ізраілі, жыхары Палестынскай аўтаноміі адказалі на прызнаньне Злучанымі Штатамі Ерусаліму сталіцай Ізраілю масавымі пратэстамі.
