У 32-ю гадавіну чарнобыльскай катастрофы ў Менску пройдзе Чарнобыльскі шлях — штогадовая акцыя ў памяць аб ахвярах аварыі на ЧАЭС і яе наступстваў. Сёлетняя акцыя пачне разьлічаную на паўгода кампанію супраць будаўніцтва Беларускай АЭС пад назвай «Астравецкі шлях».
Акцыя дазволеная Менгарвыканкамам. Збор пачнецца а 18-й гадзіне 26 красавіка на пляцоўцы каля кінатэатру «Кастрычнік», адтуль шэсьце пойдзе да чарнобыльскай капліцы (храма ў гонар абраза Божай Маці «Адшуканьне загінулых») у парку Дружбы народаў, каля якой пройдзе мітынг. Час завяршэньня акцыі — 20:30. Адначасова з Чарнобыльскім шляхам, у Кіеўскім сквэры, які недалёка ад храма, пройдзе дазволены мітынг КХП БНФ.
Свабода будзе весьці відэатрансьляцыю Чарнобыльскага шляху ад 18-й гадзіны на Youtube і ў сацсетках, плянуюцца ўключэньні нашага карэспандэнта з Астраўца, дзе будуецца БелАЭС, і з зоны, забруджанай чарнобыльскай аварыяй. Таксама будзе весьціся жывы блог на сайце svaboda.org.
Ад чарнобыльскай катастрофы так ці іначай пацярпеў ці ня кожны беларус — каля 60% радыяактыўных ападкаў аселі на тэрыторыі Беларусі, забруджана ў прыкметнай ступені каля 70% тэрыторыі краіны, на моцна забруджаных тэрыторыях жыве каля 12% насельніцтва.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў