Лінкі ўнівэрсальнага доступу

Асуджаных за наркотыкі ў Беларусі стала меней, за карупцыю — болей


Намесьнік старшыні Вярхоўнага суду Валер Калінковіч

Судовую статыстыку, якая сьведчыць пра тэндэнцыі са злачыннасьцю цягам 2017 году, прывёў журналістам першы намесьнік старшыні Вярхоўнага суду Валер Калінковіч на прэсавай канфэрэнцыі.

Асуджаныя 43 000 чалавек, апраўданыя — 98

Паводле судовай статыстыкі, у параўнаньні з 2016 годам на 3,7% зьменшылася колькасьць асуджаных, хоць агульная лічба застаецца вялікай — больш за 43 тысячы чалавек. Зь іх 12 тысяч пазбавілі волі, абмежаваньне волі атрымалі амаль 8 тысяч, умоўнае пакараньне і адтэрміноўку пакараньня — амаль 3 тысячы, 98 асоб былі апраўданыя, у тым ліку трох апраўдалі па абвінавачаньні ў забойстве, 5 асоб прысудзілі да сьмяротнага пакараньня, 3 — да пажыцьцёвага зьняволеньня.

Узрост наркаманаў павялічваецца

Валер Калінковіч паведаміў, што меней стала асуджаных паводле артыкулаў, зьвязаных з абаротам наркотыкаў — на 18,5 працэнта. У апошнія гады адзначалася ня толькі пашырэньне распаўсюду наркотыкаў і псыхатропаў, але гучнейшай стала і крытыка таго, як вядзецца барацьба з гэтай зьявай. Ініцыятыва «Рух 328» абʼяднала маці асуджаных за наркотыкі маладых людзей, якія дамагаюцца перагляду прысудаў і выкананьня правоў гэтых асуджаных у месцах зьняволеньня.

Паводле апошніх зьвестак, летась больш як удвая зьменшылася колькасьць непаўналетніх, асуджаных за збыт наркотыкаў.

На 20% зьменшылася таксама колькасьць асобаў, якіх асудзілі за кіраваньне аўтамабілем у нецьвярозым стане або пад узьдзеяньнем наркотыкаў, сказаў Валер Калінковіч.

Валер Калінковіч
Валер Калінковіч

Хабарнікаў стала болей або іх часьцей ловяць?

Летась вырасла колькасьць карупцыйных злачынстваў.

694 асобы былі асуджаныя за карупцыю, што на 22% больш, чым у 2016 годзе. Статыстыка не дае адказу на пытаньне, ці гэта чыноўнікаў-карупцыянэраў стала больш, ці зь імі пачалі больш пасьпяхова змагацца.

Паводле справаздачы Вярхоўнага суду, 240 беларускіх чыноўнікаў кралі праз злоўжываньне службовымі паўнамоцтвамі, 154 атрымлівалі хабар, 126 — давалі хабар.

Справаздача Вярхоўнага суду была падрыхтаваная па-беларуску і па-расейску, на беларускамоўныя пытаньні Валер Калінковіч адказваў па-беларуску.

«Хацела быць чэмпіёнкай у боксе». Як 16-гадовая магіляўчанка атрымала 8 гадоў «за наркотыкі»

Ваша меркаваньне

Паказаць камэнтары

XS
SM
MD
LG