Швэцыя вывучае магчымасьць адмовіць у візах расейскім і беларускім спартсмэнам, якія жадаюць удзельнічаць у міжнародных спартыўных мерапрыемствах на яе тэрыторыі, заявіў у сераду агенцтву Reuters міністар міграцыі краіны, што можа патэнцыйна заблякаваць удзел удзельнікаў, дазволеных іх кіруючымі органамі.
Гэты крок можа перашкодзіць спартсмэнам, якім нададзены нэйтральны статус, прыняць удзел у чэмпіянаце сьвету па лыжных гонках у наступным годзе ў швэдскім горадзе Фалун. Чэмпіянат па лыжных гонках, скачках з трампліна і лыжным дваябор’і заплянаваны на люты і сакавік.
«У цяперашні час мы аналізуем юрыдычныя падставы, па якіх расейскім і беларускім спартсмэнам можа быць адмоўлена ў візах», — заявіў міністар міграцыі Ёнан Форсэл у заяве агенцтву Reuters.
«Швэдскі ўрад рэзка крытыкуе дазвол расейскім і беларускім спартсмэнам удзельнічаць у міжнародных спаборніцтвах», — дадаў ён.
Форсэл заявіў, што ўрад падтрымлівае пазыцыю Швэдзкай лыжнай асацыяцыі і Швэдзкай спартыўнай канфэдэрацыі аб тым, што расейскім і беларускім спартсмэнам ня варта дазваляць спаборнічаць у Швэцыі.
«Існуе відавочная рызыка таго, што гэта можа прывесьці да нармалізацыі агрэсіі Расеі супраць Украіны», — сказаў ён.
Міжнародная фэдэрацыя лыжнага спорту і сноўборду (FIS) надала нэйтральны статус некалькім расейскім спартоўцам, што дазволіла ім удзельнічаць у яе спаборніцтвах. FIS не адказала на запыт Reuters аб камэнтары.
Расейскія і беларускія спартоўцы сутыкнуліся з шырока распаўсюджанымі абмежаваньнямі ў міжнародным спорце з таго часу, як Расея пачала паўнамаштабнае ўварваньне ва Ўкраіну ў лютым 2022 году, прычым Беларусь служыла пляцдармам для расейскіх войскаў.
Асноўныя спартыўныя арганізацыі Швэцыі падтрымліваюць намаганьні па прадухіленьні спаборніцтваў расейскіх і беларускіх спартсмэнаў у краіне, падкрэсьліваючы пры гэтым, што рашэньні аб візах і ўезьдзе прымае ўрад.
Швэдская лыжная асацыяцыя заявіла, што з моманту ўварваньня Расеі ва Ўкраіну яна прытрымліваецца той жа пазыцыі: спартсмэны з Расеі і Беларусі павінны заставацца выключанымі з міжнародных спаборніцтваў, пакуль працягваецца вайна.
Чаму гэта важна
Некаторыя міжнародныя спартовыя фэдэрацыі дапусьцілі беларускія зборныя на свае турніры, іншыя захоўваюць абмежаваньні, зьвязаныя з вайной Расеі супраць Украіны, якую падтрымлівае афіцыйны Менск.
Міжнародныя спартовыя фэдэрацыі і Міжнародны алімпійскі камітэт (МАК) увялі абмежаваньні для расейскіх і беларускіх спартоўцаў пасьля маштабнага расейскага ўварваньня ва Ўкраіну ў лютым 2022 году, якому спрыяў рэжым Лукашэнкі.
7 траўня 2026 году выканаўчы камітэт МАК скасаваў ранейшыя рэкамэндаваныя ўмовы ад 28 лютага 2022 году і ад 28 сакавіка 2023 году стасоўна Беларусі і беларускіх спартоўцаў, у тым ліку ахоўныя меры.
Пасьля гэтага абмежаваньні зь беларускіх спартоўцаў зьнялі фэдэрацыі ў наступных відах спорту: аўтамабільныя гонкі, барацьба, бокс, валейбол, веславаньне на байдарках і каноэ (з 2027 году), гандбол, гімнастыка, конны спорт, настольны тэніс, ветразевы спорт, роварны спорт, стральба з лука, студэнцкі спорт (унівэрсіяды), сучаснае пяціборства, фэхтаваньне, хакей на траве, цяжкая атлетыка, шахматы.
У хакеі беларускім камандам дазволілі вярнуцца толькі ў тры турніры сэзону 2026–2027 гадоў: мужчынскага юніёрскага чэмпіянату сьвету ў найвышэйшым дывізіёне, жаночага юніёрскага ў трэцім дывізіёне і жаночага дарослага — у чацьвёртым. Да галоўных турніраў — мужчынскага чэмпіянату сьвету і моладзевага (для гульцоў да 20 гадоў) чэмпіянату сьвету — доступу не далі.
У скалалазеньні і тэнісе беларусам дазволілі выступаць толькі паасобку і ў нэўтральным статусе. У стралецкім спорце ў нацыянальным статусе могуць выступаць толькі юніёры.
Міжнародная фэдэрацыя лёгкай атлетыкі па-ранейшаму цалкам забараняе беларускім спартоўцам удзельнічаць у сваіх спаборніцтвах — нават паасобку і ў нэўтральным статусе.
Нядаўна Міжнародная фэдэрацыя тэнісу (IFT) захавала прыпыненьня сяброўства Фэдэрацыі тэнісу Расеі і Фэдэрацыі тэнісу Беларусі".
