Найгорш з мэдыцынай — у горадзенскай турме. На канфэрэнцыі ў Вільні прэзэнтавалі рэйтынг беларускіх вязьніц

Рэйтынг грунтуецца на анкетах 58 былых зьняволеных. Паводле яго, найгорш з мэдыцынай у горадзенскай турме і шклоўскай калёніі.

Дасьледчык з арганізацыі «Лекары за праўду і справядлівасьць», былы турэмны лекар Васіль Завадзкі лічыць невыпадковым тое, што на дне рэйтынгу апынуліся вязьніцы, зьвязаныя са сьмерцямі вядомых палітвязьняў.

«Гарадзенская турма, дзе памёр мастак Алесь Пушкін, і шклоўская калёнія, дзе скончылася жыцьцё актывіста Вітольда Ашурка, там апынуліся паводле шмат якіх паказьнікаў. Можна пэўна сказаць, што гэтым вязьніцам уласьцівыя сыстэмныя недахопы пэнітэнцыярнай сыстэмы Беларусі, але ў часы масавых рэпрэсій яны абвастрыліся і дайшло да таго, што людзі там паміраюць, хаця дзяржава мусіць ахоўваць іх здароўе. Таму я і кажу, што няма больш бяспраўнага чалавека ў Беларусі, чым асуджаны».

Але мэдыкі бачаць на прыкладзе вязьніцаў і хібы ўсёй беларускай сыстэмы аховы здароўя, адзначае Васіль Завадзкі.

Наверсе рэйтынгу — жаночая калёнія № 24 у Зарэччы і мужчынская № 22 пад Івацэвічамі.

«Там параўнальна лепшыя мэдычныя ўмовы, але пра тое, як там ужываюць ШЫЗА ды маральна зьдзекуюцца з вязьняў, мы таксама добра ведаем», — заўважае Васіль Завадзкі.

Ён лічыць, што неабходна вывесьці турэмную мэдыцыну з падпарадкаваньня МУС і перадаць Міністэрству аховы здароўя.

Рэйтынг калёній і турмаў

1. ПК № 24, Зарэчча, Рэчыцкі раён — 64,91%
2. ПК № 22, Даманава, Івацэвіцкі раён — 64,76%
3. ПК № 15, Вейна, Магілёўскі раён — 64,20%
4. ПК № 4, Гомель — 63,19%
5. ПК № 9, Горкі — 62,65%
6. ПК № 2, Бабруйск — 62,43%
7. ПК № 1, Наваполацак — 57,93%
8. Турма № 8, Жодзіна — 57,38%
9. ПК № 3, Віцьба, Віцебскі раён — 55,92%
10. ПК № 14, Навасады, Барысаўскі раён — 55,32%
11. Турма № 4, Магілёў — 53,55%
12. ПК № 20, Мазыр — 51,37%
13. ПК № 17, Шклоў — 47,06%
14. Турма № 1, Горадня — 43,87%

Менш за 50% — нездавальная арганізацыя мэдычнай дапамогі;
50–60% — неабходныя тэрміновыя захады;
60–70% — здавальняльны ўзровень.

ГЛЯДЗІЦЕ ТАКСАМА:

«Астраўная мэдыцына», высокая сьмяротнасьць, недаступныя лекі, няроўны доступ. Галоўныя высновы незалежнага аналізу беларускай мэдыцыны

На віленскай канфэрэнцыі, апроч турэмнай мэдыцыны, абмяркоўваюць

• недахоп мэдычных кадраў і фінансаваньня,
• пытаньне аховы пэрсанальных зьвестак зь пераходам на лічбавую сыстэму,
• магчымасьці дабрачыннасьці пасьля нядаўняга ўказу Лукашэнкі,
• рэфармаваньне беларускай сыстэмы аховы здароўя,
• страхавую мэдыцыну
• і іншыя тэмы.

ГЛЯДЗІЦЕ ТАКСАМА:

«Я не магу перадаць, наколькі ўсе тут любяць дзяцей». Беларуска расказала, як нараджала ў Аргентыне

У зьняволеньні застаюцца 15 мэдыкаў-палітвязьняў

Паводле ByMedSol, з жніўня 2020 году 270 мэдыцынскіх працаўнікоў былі затрыманыя альбо на доўгі час пазбаўленыя волі, сярод іх 127 жанчын і 143 мужчыны.

«Некаторых лекараў затрымлівалі да чатырох разоў. У дачыненьні да 52 мэдыцынскіх работнікаў былі ўзбуджаныя крымінальныя справы, ім пагражала да 9 гадоў няволі. Большасьць мэдыкаў затрымлівалі падчас пратэстаў ці проста на вуліцы, калі іх прафэсія не была відавочная для сілавікоў.

У 12 выпадках людзей забіралі непасрэдна з працоўнага месца ці падчас аказаньня мэдыцынскай дапамогі. Сама меней у 11 выпадках паведамлялася пра ўжываньне фізычнай сілы і зьбіваньне.

Жахліва, але перасьлед мэдыкаў паводле палітычных прычын, у тым ліку крымінальны, працягваецца і ў нашы дні», — расказаў Свабодзе прадстаўнік мэдыяпраекту «Белыя халаты».

Шмат лекараў зьехалі зь Беларусі пад пагрозай перасьледу. Толькі ў Польшчы працуе ўжо больш за тысячу беларускіх мэдыкаў.

Паводле «Вясны», цяпер за кратамі застаюцца 15 мэдыкаў-палітвязьняў.

ГЛЯДЗІЦЕ ТАКСАМА:

Экспэрты прапанавалі зьмены ў сацыяльнай палітыцы ў новай Беларусі. Распавядаем пра тры зь іх