Як паведаміла выданьне «Флагшток» з спасылкай на крыніцу, зьвязаную з выканаўчай уладай, у справе фігуруюць і іншыя чыноўнікі.
«Адразу пасьля адстаўкі Прывалаву прадказвалі павышэньне — сярод мясцовых чыноўнікаў хадзілі размовы аб тым, што яго забярэ ў адно зь міністэрстваў у Менск яго сябар. Але ўсё выйшла наадварот — замест высокай пасады экс-чыноўнік атрымаў абвінавачаньне ў крымінальным злачынстве», — паведаміла выданьне.
Уладзімер Прывалаў кіраваў Гомелем з 2022 году. Сёлета ў траўні Аляксандар Лукашэнка ўзгадніў прызначэньне Руслана Пархамовіча на пасаду старшыні Гомельскага гарвыканкаму.
Што папярэднічала
Сёлета адбылося шэрагу гучных затрыманьняў чыноўнікаў паводле падазрэньняў у карупцыйных злачынствах:
- у лютым стала вядома аб перадачы ў суд крымінальнай справы былога намесьніка старшыні Горадзенскага райвыканкаму, якога, імаверна, затрымалі яшчэ ў ліпені 2025 году,
- 12 сакавіка Аляксандар Лукашэнка заявіў аб затрыманьні міністра прыродных рэсурсаў і аховы навакольля Беларусі Сяргея Масьляка паводле падазрэньняў у хабарніцтве,
- у траўні паведамілі, што больш за 20 работнікаў лясной галіны Беларусі праходзяць фігурантамі карупцыйных крымінальных справаў. Сярод найчасьцейшых абвінавачаньняў — хабарніцтва і «крадзеж драўніны шляхам злоўжываньня службовымі паўнамоцтвамі».
Чаму гэта важна
Узровень карупцыі ў Беларусі ацэньваецца як высокі. У Індэксе ўспрыманьня карупцыі ад арганізацыі Transparency International Беларусь стабільна займае нізкія радкі — нягледзячы на тое, што Аляксандар Лукашэнка пазыцыянуе сябе як антыкарупцыйны палітык.
Асноўнымі фактарамі карупцыі ў Беларусі ёсьць манаполія дзяржавы і брак кантролю, калі выканаўчая ўлада кіруе эканомікай безь незалежнага кантролю з боку заканадаўчай і судовай сыстэмаў, што стварае спрыяльныя ўмовы для злоўжываньняў.
Беларуская дзяржава практычна не публікуе афіцыйныя справаздачы аб барацьбе з карупцыяй і адмаўляецца ад міжнародных праверак, напрыклад, ад супрацы з групай GRECO.
Спрыяе карупцыі і брак свабодных мэдыя ў краіне, бо пасьля 2020 году ўлады крыміналізавалі незалежную журналістыку, таму вядомымі становяцца толькі адзінкавыя факты карупцыі, а рэальныя маштабы карупцыйных схемаў і расьсьледаваньні ўлады прыхоўваюць.
Форум