Перад Днём Перамогі, які адзначаецца ў Беларусі 9 траўня, вэтэраны атрымліваюць матэрыяльную дапамогу. З гэтай нагоды актывізаваліся і махляры.
Як паведамляюць дзяржаўныя рэсурсы, афэрысты тэлефануюць пажылым людзям, называюцца супрацоўнікамі органаў сацыяльнай абароны ці іншых дзяржаўных органаў і кажуць:
«Вам належыць выплата да Дня Перамогі. Назавіце рэквізыты карты для залічэньня».
Часам просяць перавесьці суму «для актывацыі выплатаў».
Як паведаміла агенцтва БелТА, у міліцыю за мінулы дзень паступіла больш за 500 паведамленьняў пра тэлефонныя званкі ад махляроў. Паводле МУС Беларусі, «вішынг» — тэлефонныя званкі ад імя супрацоўнікаў дзяржаўных структураў — выйшаў на першае месца сярод кібэрзлачынстваў.
Сапраўдныя выплаты вэтэранам пачаліся ад 5 траўня. Інваліды і ветэраны вайны маюць атрымаць па 5 тысяч рублёў.
«Палітызацыя» махляроў у Беларусі
Сілавыя органы Беларусі паведамляюць, што махляры ўсё часьцей выкарыстоўваюць штучны інтэлект для сваіх схемаў выманьваньня грошай. Яны часта выступаюць ад імя сілавых структураў, пагражаючы вобшукам і арыштам, прапануюць паслугі хуткага афармленьня візаў або замены лічыльнікаў ці дамафонаў.
Апошнім часам у інфармацыйнай прасторы зьявілася рэкляма махляроў з выкарыстаньнем штучнага інтэлекту: махляры выкарыстоўваюць імёны вядомых асобаў, каб выклікаць давер у людзей.
Згодна з інфармацыяй УУС Менскага гарвыканкаму, летась у Менску крадзяжоў праз тэлефон і інтэрнэт стала больш, чым па лініі крымінальнага вышуку.
Як паведаміў Сьледчы камітэт Беларусі, напрыклад, малады чалавек зь Сьветлагорску паверыў махлярам і вырашыў «супрацоўнічаць з Камітэтам дзяржаўнага кантролю».
У Нясьвіжы зламысьнікі выдавалі сябе за супрацоўнікаў КДБ, банку і пошты і пагражалі грамадзянам крымінальным перасьледам за «спрыяньне тэрарызму».
У іншым выпадку малады чалавек, упэўнены, што стаў «рэгіянальным прадстаўніком КДБ», забраў нібыта «на праверку» 84 тысячы рублёў у браслаўскай пэнсіянэркі.
У Менску фіктыўны «супрацоўнік Сьледчага камітэту» прымусіў пэнсіянэра аддаць ашчаджэньні кур’еру, якая сама думала, што дапамагае пэнсіянэрам з інваліднасьцю «ўнікнуць крымінальнага перасьледу», перадае тэлеграм-канал МУС Беларусі.