Латушка: Я наўпрост кажу амэрыканцам, што не ўяўляю Лукашэнку ў Белым доме, але яны ўсё роўна хочуць запрасіць

Паводле словаў Паўла Латушкі, калі ён дыскутуе на гэтую тэму з амэрыканцамі, у тым ліку публічна, то кажа: «А вы хочаце запрасіць у міжнародную супольнасьць альбо нават у эўрапейскую супольнасьць каго? Бандыта, які зьдзейсьніў злачынствы супраць украінскіх дзяцей-сірот, вывез іх у Беларусь, а пазьней іх адаптавалі (усынавілі ці ўдачарылі. — „Позірк“.) на тэрыторыі Расейскай Фэдэрацыі? Ідзе афіцыйная справа (у Міжнародным крымінальным судзе. — „Позірк“.). Бандыта, які зьдзейсьніў злачынствы супраць беларускага народа, супраць чалавечнасьці — самыя цяжкія міжнародныя злачынствы? Бандыта, які прадаставіў тэрыторыю Беларусі для агрэсіі супраць Украіны?»

Латушка адзначыў, што пасьля вызваленьня палітвязьня Анджэя Пачобута ён даў «мінімум 25 інтэрв’ю». «І там пыталіся: а што гэта азначае? Гэта азначае, што Лукашэнка мяняе палітыку? І гэтыя пытаньні ставіў кожны журналіст. І я на іх адказваў: важная справа — вызваленьне Анджэя Пачобута, і мы ўсе радыя гэтаму, бо гэта наш супольны беларуска-польскі грамадзянін. Але гэта не азначае, што Лукашэнка мяняе палітыку», — сказаў кіраўнік НАУ.

Цяперашні амэрыканскі прэзыдэнт Дональд Трамп не аднойчы запрашаў Лукашэнку ў Вашынгтон.

1 траўня ў Варшаве пачалася канфэрэнцыя беларусаў і беларусак сьвету. Падчас выступу Сьвятланы Ціханоўскай некалькі чалавек паднялі плякаты з крытыкай на яе адрас. Пазьней Ціханоўская пракамэнтавала журналістам, што спадзяецца на канкрэтныя прапановы ад гэтых людзей, калі іх не задавальняе яе праца.

ГЛЯДЗІЦЕ ТАКСАМА:

Трамп кліча Лукашэнку, а інтэграцыя з Расеяй паглыбляецца. Тыдзень з Карбалевічам