Аляксандар Лукашэнка прыняў кіраўніцу сэнату Рэспублікі Зымбабвэ Мэйбл Мэмары Чынамону і абмеркаваў зь ёю «міжпарлямэнцкі дыялёг і гандлёва-эканамічную супрацу».
«Я, абдумваючы пэрспэктывы працы Беларусі ў Афрыцы, вярнуўся да старой тэзы, якую мы абмяркоўвалі з вашым прэзыдэнтам: нам вельмі патрэбны пункт апоры на ўзьбярэжжы афрыканскага кантынэнту, на паўднёвым усходзе. [...] Гэта значыць, што мы разам павінны папрацаваць з Зымбабвэ над будаўніцтвам парта ў вашай суседняй дзяржаве — Мазамбіку», — працытаваў Лукашэнку Telegram-канал ягонай прэсавай службы.
Паводле яго, у дачыненьнях Беларусі і Зымбабвэ «практычна няма ніякіх праблемаў».
«Нам трэба проста ісьці адпаведна нашай „дарожнай мапе“, якая распрацаваная, і рэалізаваць тыя мерапрыемствы, якія вызначае гэты плян. Мы ў гэтым дачыненьні будзем рабіць усё, што паабяцалі», — сказаў Лукашэнка.
Паводле яго, для супрацы важна, каб «сэнатары, парлямэнтары ажыцьцяўлялі кантроль за рэалізацыяй дасягнутых дамоўленасьцяў, як у вас у Зымбабвэ, так і ў нас».
19 лютага ў Вашынгтоне (ЗША) прэзыдэнт Дональд Трамп правядзе першае пасяджэньне ініцыяванай ім Рады міру. Ён запрасіў кіраўнікоў усіх дзяржаваў, які падпісалі статут гэтай арганізацыі. Сярод запрошаных быў і Аляксандар Лукашэнка, але, як паведаміла ягоная прэсавая сакратарка Натальля Эйсмант, запрашэньне атрымалі з спазьненьнем, калі ўжо «працоўны графік на гэты пэрыяд ужо быў сплянаваны»
«Так, мы з задавальненьнем наведалі б ЗША, але ёсьць пытаньні, якія немагчыма адкласьці», — сказала Натальля Эйсмант.
Апроч таго, паводле яе, адмова ад удзелу ў сустрэчы таксама была прадыктаваная «лягістычнымі складанасьцямі», якія маглі б вынікаць зь міжнародных санкцыяў, найперш санкцыяў Эўразьвязу, з улікам закрыцьця паветранай прасторы над ЭЗ.
Форум