Падзеі 21 красавіка ў беларускай і ўсясьветнай гісторыі.
Дата дня
21 красавіка 1597 году быў пакараны сьмерцю Севярын Налівайка. Правадыр казацкага паўстаньня быў выгнаны ўрадавымі войскамі з Украіны на тэрыторыю цяперашняй Беларусі, дзе распачаў сапраўдную вайну. Паўстанцы захапілі Слуцак, Магілёў, Пінск ды іншыя гарады. Урэшце іх разьбілі, а Налівайка быў схоплены.
Таксама ў гэты дзень
1863 — Зыгмунт Серакоўскі разьбіў расейцаў у бітве пад Генетынамі (цяпер у Панявескім раёне, Літва).
1914 — у Беларусі адбылася першая авіяцыйная катастрофа на вайсковым лётнішчы ў Лідзе. У ёй загінулі падпаручнік Вятчынкін і мэханік Кавальчук. Яны выпрабоўвалі самалёт Nieuport IV, які з вышыні 300 мэтраў раптам пайшоў уніз.
1919 — войскі генэрала Жалігоўскага авалодалі Вільняй. У выніку спыніла сваё існаваньне Літоўска-Беларуская савецкая рэспубліка, бальшавікі паўцякалі, а Вільня на 20 гадоў апынулася ў складзе Польшчы.
1921 — выйшаў першы нумар газэты «Чырвоная зьмена». Выходзіла самастойным выданьнем да 2002 году, цяпер — дадатак да газэты «Звязда».
1996 — расейскія фэдэральныя войскі забілі першага прэзыдэнта Чачэнскай рэспублікі Ічкерыя генэрала Джахара Дудаева. Паводле афіцыйных зьвестак, Дудаеў загінуў ад ракеты, наведзенай на сыгнал ягонага спадарожнікавага тэлефона.
У гэты дзень нарадзіліся
1833 — Віктар Отан Каліноўскі, гісторык, археограф, бібліяфіл, удзельнік нацыянальна-вызвольнага руху, брат Кастуся Каліноўскага.
1835 — Ялегі Пранціш Вуль, паэт, удзельнік паўстаньня 1863–64 гадоў.
Што табе, дудар, прысьпела
Сьмелы песьні завадзіць?
Ці то лёгкае, брат, дзела,
Нашу брацьцю прасьвяціць?
Крыкнуць на цябе панове,
Што ты шкоднік і місьцюк. —
Страціш голас і здароўе
І дуду упусьціш з рук.
1902 — нарадзіўся Вацлаў Пянткоўскі, каталіцкі сьвятар, вязень ГУЛАГУ, арганізатар падпольнай сэмінарыі на Палесьсі, аўтар мэмуараў.
1903 — Мікола Аляхновіч, беларускі літаратурны крытык.
1926 — Лізавета II, каралева Вялікай Брытаніі ад 1952 году.
1968 — Аляксей Андрэеў, стваральнік альманаху «Монолог», папулярызатар беларускай культуры ў расейскамоўным сьвеце.
У памяці
1910 — памёр Марк Твэн, амэрыканскі пісьменьнік.
1923 — памёр Ігнат Канчэўскі (Абдзіраловіч), беларускі паэт, філёзаф і публіцыст.
2019 — падчас экамаратону ў Гомелі (забег на 21 км) за некалькі мэтраў да фінішу памёр Юры Бліноў, піяніст, першы беларускі музыка, які выступіў з сольным канцэртам у Карнэгі-Голе ў Нью-Ёрку, быў сузаснавальнікам футбольнага клюбу «Крумкачы».
2022 — Анатоль Вярцінскі, паэт, рэдактар, палітык.
Гэты боль асаблівы —
Боль за родныя нівы.
Асабліва шчымлівы.
Асабліва журлівы…
Не скажу: апраметны.
Не зазначу: сьмяротны.
Ды ён дужа адметны —
боль за край наш родны.
Яго носіш дзе ты?
У душы? За грудзінай?
Знаеш толькі: боль гэты —
боль за лёс Радзімы.
