Наступствы расейскага ўдару па Львове, 24 сакавіка 2026 году
Губэрнатар Ленінградзкай вобласьці Аляксандар Дразьдзенка паведаміў, што над рэгіёнам у ноч на 25 сакавіка зьбілі 56 дронаў.
«Ва Ўсьць-Луге ў зоне парта вядзецца лякалізацыя ўзгараньня. У Выбаргу пашкоджаны дах жылога дому. Папярэдне ніхто не пацярпеў», — паведаміў Аляксандар Дразьдзенка.
Усьць-Луга — другі ключавы марскі порт Расеі на Балтыйскім моры, празь які Масква экспартуе сырую нафту і нафтапрадукты. У ноч на 23 сакавіка ўкраінскія сілы атакавалі ў Ленінградзкай вобласьці порт у Прыморску — тады ў выніку пашкоджаньня ёмістасьці з палівам пачаўся пажар, аэрапорт «Пулкава» не працаваў больш за 15 гадзін.
Ва Ўкраіне дзясяткі параненых пасьля найбуйнейшай расейскай атакі дронамі
Расейскія войскі ў ноч на 24 сакавіка і ўвесь наступны дзень выкарысталі супраць Украіны амаль тысячу ўдарных дронаў — 365 уначы і 541 удзень. Ад абстрэлу пацярпела пераважна заходняя частка Ўкраіны.
У Львоўскай вобласьці на раніцу 25 сакавіка паведамілі аб 32 параненых, у Віньніцкай — адзін чалавек загінуў і 13 параненыя, у Івана-Франкоўску — два чалавекі загінулі і чатыры (у тым ліку адно дзіця) параненыя, у Жытоміры — параненая 12-гадовая дзяўчына, у Днепрапятроўскай вобласьці параненыя 16 чалавек, у Хмяльніцкай вобласьці паранены адзін чалавек, у Запароскай — два чалавекі загінулі, 13 параненыя.
Ад абстрэлаў пацярпелі таксама Ровенская, Жытомірская і Чарнігаўская вобласьці. Расейскія войскі паўсюль намагаліся пацэліць па цэнтрах абласных гарадоў.
Форум