Міністры замежных справаў краін ЭЗ, якія сабраліся ў Брусэлі 23 лютага, ня здолелі дасягнуць пагадненьня праз супраціў з боку Вугоршчыны і Славаччыны.
«Мне вельмі шкада, што сёньня мы не дасягнулі пагадненьня, улічваючы, што заўтра — сумная гадавіна пачатку вайны. Мы павінны паслаць моцны сыгнал Украіне, што працягваем яе падтрымліваць, і адначасова ўзмацніць ціск на Расею», — заявіла кіраўніца зьнешняй палітыкі ЭЗ Кая Калас.
Яна дадала, што праца над 20-м пакетам санкцыяў ЭЗ з 2022 году будзе працягвацца.
Што было ў пакеце пра санкцыі супраць Беларусі
Адносна Беларусі ў новым пакеце санкцый прапануецца распаўсюдзіць на яе існуючыя супраць Расеі абмежавальныя захады. У тым ліку забарону на экспарт у краіну тавараў, якія выкарыстоўваюць перадавыя тэхналёгіі, прамысловых трактароў з магутнасьцю рухавіка больш за 130 кВт, мэталаапрацоўчых станкоў, шкляных вырабаў для лябараторый, гумы, змазачных матэрыялаў, якія функцыянуюць пры розных тэмпэратурах, і шэрагу іншых матэрыялаў, рэчываў і прыстасаваньняў.
- ЭЗ прапануе забараніць аказаньне Беларусі паслугаў у сфэры кібэрбясьпекі. Забарона будзе дзейнічаць у дачыненьні да дзяржаўных органаў і структураў, што дзейнічаюць ад іх імя.
- Упершыню ў санкцыйны сьпіс трапляе турызм. ЭЗ хоча забараніць працу турагенцтваў і турапэратараў, паслугі гідаў і рэкляму турыстычных паездак у Беларусь. Для кантрактаў, якія ўжо дзейнічаюць, прадугледжаны кароткі пераходны пэрыяд.
- Каб паменшыць абыход санкцый, ЭЗ плянуе пашырыць спіс тавараў і тэхналёгій, забароненых для транзыту праз тэрыторыю Беларусі.
- ЭЗ таксама прапануе дадатковыя забароны на імпарт тавараў зь Беларусі, у тым ліку дадатковых відаў сыравіны, карысных выкапняў, мэталаў, хімічных рэчываў, гумавых вырабаў, дублёных шкураў.
- Таксама ўзмацняецца юрыдычная абарона для кампаній з Эўразьвязу ад пазоваў ня толькі зь беларускага боку, але і ад суб'ектаў з трэціх краін, якія могуць пацярпець праз санкцыі ЭЗ адносна Беларусі.
20 лютага міністар замежных спраў Літвы Кястуціс Будрыс паведаміў у інтэрвію LRT, што пакетам у ліку прадугледжана «пашырэньне некаторых мер у дачыненьні да Беларусі».
У тым жа інтэрвію Будрыс заявіў, што на тыдні 23 лютага Рады ЭЗ па агульных справах «зь верагоднасьцю 95%» прадоўжыць санкцыі ў дачыненьні да Беларусі яшчэ на год і «у тым жа аб’ёме, у якім яны дзейнічаюць цяпер», нагадвае «Позірк».
Пра тое, што ЭЗ мае намер падоўжыць індывідуальныя і сэктаральныя санкцыі ў дачыненьні да Беларусі яшчэ на адзін год, заявіў 19 лютага і прэзыдэнт Літвы Гітанас Наўседа.
Вугорскае і славацкае вета не зьвязаныя з самімі абмежавальнымі мерамі, а тычацца спыненьня паставак расейскай нафты па савецкім нафтаправодзе «Дружба», які ідзе ў дзьве цэнтральнаэўрапейскія краіны праз тэрыторыю Ўкраіны.
Санкцыі прадугледжвалі забарону на марскія паслугі, зьвязаныя з расейскімі нафтапрадуктамі, што не дазволіла б кампаніям з ЭЗ абслугоўваць судны, якія перавозяць такую прадукцыю з расейскіх партоў.
Таксама плянаваліся меры супраць так званага «ценявога флёту» Масквы, які выкарыстоўваецца для абыходу санкцыяў, і супраць трэціх краін, што дапамагаюць Расеі.
Акрамя таго, не ўдалося пераадолець яшчэ адно вета Будапэшта — адносна выдзяленьня Ўкраіне крэдыту ЭЗ на 90 мільярдаў эўра на 2026–2027 гады, папярэдне ўзгодненага лідэрамі блёку ў сьнежні.
Паводле інфармацыі з пасяджэньня, якую атрымала RFE/RL, сярод астатніх 25 краін ЭЗ назіраецца «шырокае расчараваньне». Некаторыя міністры адкрыта паставілі пад сумнеў матывы Вугоршчыны, мяркуючы, што справа хутчэй у парлямэнцкіх выбарах у красавіку, а не ў нафце.
- Пастаўкі нафты па «Дружбе» спыніліся 27 студзеня пасьля таго, як Кіеў паведаміў пра ўдар расейскага дрона па абсталяваньні нафтаправоду на захадзе Ўкраіны. Аднак Будапэшт і Браціслава абвінавачваюць Украіну ў нежаданьні рамантаваць пашкоджаньні.
- Абедзьве краіны, якія ня маюць выхаду да мора, усё яшчэ залежаць ад расейскай нафты і атрымалі выключэньні з санкцый ЭЗ, што забараняюць яе імпарт.
- Міністар замежных справаў Вугоршчыны Пэтэр Сіярта заявіў, што «няма ні тэхнічных, ні апэрацыйных перашкодаў для аднаўленьня транзыту нафты ў Вугоршчыну і Славаччыну па „Дружбе“», назваўшы дзеяньні Ўкраіны «палітычнымі» і «шантажом».
- Прэм’ер-міністар Славаччыны Робэрт Фіца таксама прыгразіў спыніць аварыйныя пастаўкі электраэнэргіі ва Ўкраіну, калі транзыт ня будзе адноўлены 23 лютага.
- У студзені Славаччына забясьпечыла амаль пятую частку ўкраінскага імпарту электраэнэргіі на фоне масаваных расейскіх удараў па энэргетычнай інфраструктуры.
- У Эўракамісіі заявілі, што «Расея зьнішчыла нафтаправод „Дружба“», а Ўкраіна абавязалася яго адрамантаваць. 25 лютага павінна сабрацца група энэргетычнай каардынацыі ЭЗ, каб абмеркаваць сытуацыю.
- Нягледзячы на тое, што Вугоршчына атрымала права не ўдзельнічаць у фінансаваньні, для выкарыстаньня агульнага бюджэту ЭЗ патрэбная аднагалосная падтрымка ўсіх дзяржаў-чальцоў.
- Эўрапарлямэнт ужо падтрымаў выдзяленьне крэдыту, і да нядаўняга часу ў Брусэлі разьлічвалі хутка прыняць канчатковае рашэньне, каб сродкі паступілі ва Ўкраіну да магчымага бюджэтнага дэфіцыту ў красавіку.
Форум