Пра гэта паведаміла інфармацыйнае агенцтва «Позірк» са спасылкай на галоўнага дарадцу Ціханоўскай Франка Вячорку.
Перамовы прайшлі ў кулюарах Мюнхэнскай канфэрэнцыі ў бясьпецы з удзелам былога палітвязьня, мужа Ціханоўскай Сяргея Ціханоўскага.
Па словах Вячоркі, Сьвятлана і Сяргей Ціханоўскія праінфармавалі Олянгрэн аб працэсе вызваленьня беларускіх палітвязьняў, адзначыўшы значную ролю ЗША ў гэтым пытаньні, і падкрэсьлілі неабходнасьць падтрымкі гуманітарнага трэку.
Яны абмеркавалі формулу, у адпаведнасьці зь якой санкцыі ЗША могуць зьмягчацца пры ўмове вызваленьня людзей і спыненьня рэпрэсіяў, але цяпер ня можа быць гаворкі пра зьмякчэньне санкцыяў ЭЗ, уведзеных, у прыватнасьці, за спрыяньне расейскай агрэсіі ва Ўкраіне і гібрыдныя атакі супраць краінаў-суседзяў Беларусі.
Дэмакратычная лідэрка адзначыла, што, на жаль, месца вызваленых палітвязьняў займаюць новыя. Пры гэтым рэпрэсіі — гэта «ня толькі пра людзей у турмах, але і пра забарону неляяльных рэжыму СМІ і партый, перасьлед прафсаюзаў, немагчымасьць вяртаньня людзей у Беларусь, абмежаваньне іх мабільнасьці».
Паводле Вячоркі, Ціханоўскія і Олянгрэн абмеркавалі таксама супрацоўніцтва зь вярхоўным камісарам ААН па правах чалавека.
Яны абмяняліся думкамі аб тым, які менавіта ціск трэба аказаць на рэжым, каб ён пайшоў на саступкі ў галіне правоў чалавека.
Ціханоўская праінфармавала аб справаздачы Міжнароднай плятформы ў прыцягненьні да адказнасьці для Беларусі (IAPB) у дачыненьні да мэханізмаў, якія могуць быць задзейнічаныя за рэпрэсіі супраць беларусаў.
Ціханоўская адзначыла, што вызваленьне людзей і спыненьне рэпрэсій — галоўны прыярытэт, але сытуацыя з правамі чалавека ніякім чынам не паляпшаецца і мяч знаходзіцца на баку рэжыму.
«Праблема не ў адсутнасьці дыялёгу, а ў адсутнасьці жаданьня беларускага рэжыму паляпшаць і мяняць сытуацыю», — заявіла Ціханоўская, заклікаўшы ЭЗ працягваць ціск на рэжым, пакуль сытуацыя рэальна не палепшыцца.
Мюнхэнская канфэрэнцыя ў бясьпецы — штогадовы міжнародны форум, які праводзіцца з 1963 году.
Ціханоўская ўдзельнічае ў яе мерапрыемствах з 2022 году. Сёлета яна ўжо выступіла перад удзельнікамі сустрэчы маладых лідэраў і на міжнароднай сустрэчы жанчын-лідэраў Women Political Leaders, сустрэлася з генэральнай сакратаркай Парлямэнцкай асамблеі NATO Бэнэдэтай Бэрці і памочнікам генэральнага сакратара NATO Борысам Руге.
Форум