Джэфры Эпштэйн — амэрыканскі фінансіст. Яго двойчы судзілі за злачынствы сэксуальнага характару, абвінавачвалі ў стварэньні сеткі вэрбаваньня і сэксуальнай эксплюатацыі непаўналетніх дзяўчат, што дзейнічала шмат гадоў.
У 2005 годзе Эпштэйна першы раз арыштавалі па абвінавачваньні ў разбэшчваньні 14-гадовай дзяўчынкі, паліцыя выявіла дзясяткі меркаваных ахвяраў, аднак пракуратура таемна ад ахвяраў дамовілася аб пазасудовай угодзе, фінансіст атрымаў 1,5 году турмы і дазвол рэгулярна адлучацца зь яе ў сваіх справах. У 2019 годзе Эпштэйн быў зноў арыштаваны ФБР і пакончыў з сабой у турме, будучы пад арыштам. Яго саўдзельніца Гісьлейн Максвэл асуджаная ў 2021 годзе і адбывае 20-гадовы тэрмін.
30 студзеня Мінюст ЗША на патрабаваньне Кангрэсу ЗША апублікаваў у інтэрнэце каля 3 мільёнаў розных дакумэнтаў у справе Эпштэйна, дзе згадваюцца такія імёны як Дональд Трамп, Біл Гейтс, Былы брытанскі прынц Эндру і іншыя вядомыя асобы. Ёсьць каля 1500 згадак пра Беларусь і грамадзян Беларусі. Што пра іх вядома.
Прафэсійная мадэль В. С.
У матэрыялах справы ёсьць копія беларускага пашпарту на імя В. С. У кантэксьце ня згадваецца, зьяўляецца яна пацярпелай па гэтай справе, ці праходзіць у нейкім іншым статусе.
З этычных прычынаў мы не раскрываем асабістыя дадзеныя беларускі, якая ня ёсьць публічнай асобай.
Вядома, што дзяўчына нарадзілася ў Горадні ў 1998 годзе.
Свабода адшукала сацыяльныя сеткі беларускі В.С., дзе цалкам супадае ўказаная пры рэгістрацыі дата нараджэньня. Як вынікае з гэтых профіляў, жанчына — прафэсійная мадэль. Яна займалася, у тым ліку, рэклямай вядомых брэндаў у 2016–2018 гадах, напрыклад Mark Formelle. Вучылася ў Горадзенскім дзяржаўным унівэрсытэце імя Янкі Купалы.
На пэрыяд 2017–2019 гады прыпадае час актыўных падарожжаў дзяўчыны. Калі меркаваць па фатаздымках з сацыяльных сетак, яна наведвала Бэрлін, Мальдывы, Харватыю, Японію, Тайлянд, Дубай, Рым.
Потым В.С. выйшла замуж і зьмяніла прозьвішча. Апошні яе пост у знойдзеным Свабодай адкрытым акаўнце датуецца лютым 2021 году, там ейны фатаздымак у адкрытай вопратцы, з буйнымі завушніцамі.
Загадка Карыны Шуляк
Найбольш жа файлаў і апублікаваных дакумэнтаў тычыцца Карыны Шуляк, блізкай сяброўкі і меркаванай каханкі фінансіста. Паводла спэцыяльнасьці Карына — стаматоляг, навучалася ў БДМУ з 2006 па 2010 год, але ня скончыла ўнівэрсытэт.
Пры гэтым, Карына Шуляк мела добрыя адзнакі ў профільных прадметах: стаматалёгія — 9, фізіялёгія — 8, хірургічная паталёгія — 9, артаданталёгія — 8.
Шуляк прыехала ў ЗША ў 2009 годзе, а ў 2010 пазнаёмілася там з Джэфры Эпштэйнам, які вызваліўся пасьля 13 месяцаў турмы за ўцягваньне ў прастытуцыю непаўнелетніх.
Унівэрсытэт у Беларусі дзяўчына кінула на 4 курсе і пазьней у анкеце, як вынікае з дакумэнтаў, ужо ў ЗША тлумачыла гэта «дыктатарскім рэжымам у Беларусі» і «адсутнасьцю бясьпекі за сябе».
Гэта вынікае з перапіскі з Эпштэйнам у студзені 2012 году, Карына цытуе частку сваёй анкеты, пытаецца, ці правільна яна адказала.
Стасункі пары былі настолькі блізкімі, што Эпштэйн зьбіраўся прыехаць у Беларусь і спыніцца ў бацькоў Карыны Шуляк. Аднак, Эпштэйн у Беларусь так і не прыехаў, гэта пацьвердзілі ў арганізацыі былых сілавікоў Belpol. Гэта мусіла адбыцца ў траўні 2016 году. У перапісцы з беларускім консульствам Шуляк даводзіла, што Эпштэйн зьбіраецца ў госьці менавіта да яе.
Эпштэйн у Беларусь так і не прыехаў, гэта пацьвердзілі ў арганізацыі былых сілавікоў Belpol
Бацька Карыны — Ігар Шуляк ня раз атрымліваў буйныя грашовыя пераводы як ад Эпштэйна, так і ад сваёй дачкі. Напрыклад, у кастрычніку 2013 год Карына перавяла свайму бацьку 20 000 даляраў.
Былі і іншыя пераводы са значнымі сумамі: 10 000 даляраў, 20 000 даляраў, 25 000 у розныя гады. Згодна з базамі дадзеных, бацька Карыны — Ігар Шуляк прадпрымальнік, маці — беспрацоўная. Бацькі карыны Шуляк знаёмыя з Эпштэйнам асабіста, з архіваў дакумэнтаў вынікае, што яны прыляталі ў ЗША ў 2012 годзе і, магчыма, пазьней.
Згодна з апублікаванымі дакумэнтамі, Эпштэйн браў вельмі актыўны ўдзел у жыцьці Карыны Шуляк у ЗША, дапамагаў з атрыманьнем дакумэнтаў, адукацыяй, ліцэнзіяй, каб яна магла працаваць паводле спэцыяльнасьці — стаматолягам.
Згодна зь інфармацыяй The New York Times, Карына Шуляк магла быць апошнім суразмоўцам Эпштэйна. Такая размова згадваецца ў дакумэнтах, але там не пазначаецца канкрэтнае імя чалавека.
Сярод дакумэнтаў, апублікаваных Міністэрствам юстыцыі, ёсьць траставае пагадненьне, падпісанае Джэфры Эпштэйнам 8 жніўня 2019 года — усяго за два дні да яго самагубства ў турэмнай камэры. Паводле аналізу ABC News, беларуска Шуляк — галоўная бэнэфіцыярка ягонай маёмасьці. У дакумэнтах пазначана, што Эпштэйн запісаў на яе 50 мільёнаў даляраў. А таксама нерухомасьць:
- ранча Эпштэйна Zorro ў Нью-Мэксыка;
- яго ўласнасьць на скандальна вядомым востраве Літл-Сэнт-Джэймс і суседнім Грэйт-Сэнт-Джэймс;
- кватэра ў адным з самых прэстыжных раёнаў Парыжу, каля Трыюмфальнай аркі;
- маёнтак у Палм-Біч;
- таўнхаўс у Верхнім Іст-Сайдзе Мангэтэну.
Карына Шуляк афіцыйна не камэнтавала гэтыя зьвесткі.
Таксама ў дакумэнтах знайшоўся допіс былой герцагіні Ёрку Сары Фэргюсан, якая віншуе Эпштэйна з нараджэньнем хлопчыка. Раней не было вядома пра якіх-кольвек дзяцей фінансіста-пэдафіла. Мэдыя задаюцца пытаньнем, ці мае да гэтага дачыненьне Карына Шуляк.
Форум