У дакумэнтах былі згадкі пра шматлікіх вядомых асоб, у тым ліку прэзыдэнта ЗША Дональда Трампа, сузаснавальніка Microsoft Біла Гейтса, міністра гандлю Говарда Лютніка і брытанскага мільярдэра Рычарда Брэнсана.
Справа Эпштэйна і рэакцыя Трампа
Намесьнік генэральнага пракурора ЗША Тод Бланш 1 лютага заявіў, што ўлады больш ня будуць выстаўляць абвінавачваньні пасьля публікацыі мільёнаў новых дакумэнтаў, зьвязаных з асуджаным за сэксуальныя злачынствы Эпштэйнам, піша CNN.
Больш за тры мільёны адзінак дакумэнтаў, цяпер дасяжных у інтэрнэце, уключалі электронныя лісты, фатаграфіі і відэа, а таксама згадкі шматлікіх уплывовых асоб, такіх як прэзыдэнт ЗША Дональд Трамп, мільярдэры Ілан Маск, Біл Гейтс, Рычард Брэнсан, былы брытанскі прынц Эндру Маўнтбатэн-Віндзар, рэжысэр Вудзі Ален, былы амэрыканскі прэзыдэнт Біл Клінтан.
Гіслейн Максвэл, былая каханка Эпштэйна, — адзіная іншая асоба, абвінавачаная ў сувязі зь ягонымі злачынствамі. Яна была асуджана за гандаль непаўналетнімі дзяўчынкамі для Эпштэйна і адбывае 20-гадовы тэрмін пазбаўленьня волі.
Пацярпелыя ад дзеяньняў Эпштэйна і ягоных прыяцеляў заявілі, што іх меркаваныя крыўдзіцелі «застаюцца схаванымі і абароненымі», нягледзячы на апошняе публікаваньне дакумэнтаў.
Тод Бланш, які раней быў адвакатам Трампа, адхіліў здагадкі аб тым, што няёмкія матэрыялы пра прэзыдэнта былі выдаленыя, а сам Трамп выказаў перакананьне, што апошні збор дакумэнтаў якраз ачысьціў ягонае імя, насуперак чаканьням палітычных апанэнтаў, перадусім ультралевых.
Трамп раней даваў розныя тлумачэньні таго, чаму ён пасварыўся з Эпштэйнам, і раскрытыкаваў архіўныя матэрыялы, кажучы, што людзі, якія наіўна сустракаліся з Эпштэйнам на працягу многіх гадоў, рызыкавалі быць ачарнёнымі.
Варта дадаць, што сама згадка ў «файлах Эпштэйна» не азначае датычнасьці асобы да злачынстваў.
Хто яшчэ патрапіў у хронікі з апошняга апублікаваньня, піша агенцтва AFP.
Кронпрынцэса Нарвэгіі
Кронпрынцэса Нарвэгіі Мэтэ-Марыт, імя якой згадваецца як мінімум 1000 разоў у мільёнах нядаўна апублікаваных дакумэнтаў, папрасіла прабачэньня за сваё «няёмкае» сяброўства з Эпштэйнам. Ліставаньне, апублікаванае ў нарвэскіх СМІ, датуецца 2011–2014 гадамі.
У адным з электронных лістоў Мэтэ-Марыт спытала Эпштэйна, ці «непрыстойна ёй як маці прапанаваць дзьвюх голых жанчынаў, якія нясуць дошку для сэрфінгу, на шпалеры для 15-гадовага сына».
Кронпрынцэса заявіла, што глыбока шкадуе аб любых кантактах з Эпштэйнам. Паводле зьвестак палацу, Мэтэ-Марыт спыніла кантакты з Эпштэйнам у 2014 годзе, бо лічыла, што ён «спрабуе выкарыстаць свае адносіны з кронпрынцэсай як рычаг узьдзеяньня на іншых людзей».
Выцек інфармацыі адбыўся ў неспрыяльны для манаршай асобы час, чый 29-гадовы сын Марыюс Борг Гойбі ў аўторак паўстане перад судом у акруговым судзе Осла. Яго абвінавачваюць у 38 злачынствах, у тым ліку ў згвалтаваньні чатырох жанчын, а таксама ў нападзе і наркатычных злачынствах. Ён адмаўляе найбольш сур’ёзныя абвінавачваньні.
Брытанскі прынц Эндру
Былы брытанскі прынц Эндру зноў апынуўся ўцягнутым у скандал з Эпштэйнам. Цяпер паказаныя недатаваныя фатаграфіі, на якіх ён стаіць на каленях над жанчынай, якая ляжыць на падлозе. Прэм’ер-міністар Вялікай Брытаніі Кір Стармэр адказаў «так» на пытаньне, ці павінен цяпер прынц адказваць перад Кангрэсам ЗША.
У кастрычніку летась кароль Карл III пазбавіў свайго брата каралеўскіх тытулаў і ўзнагародаў. Гэта адбылося пасьля таго, як цяпер памерлая абвінаваўца Эпштэйна Вірджынія Джуфрэ заявіла, што яе тройчы прывозілі для сэксу з Эндру, калі яна мела 17 гадоў.
Дарадца ўраду Славаччыны
Дарадца ўраду Славаччыны ў нацыянальнай бясьпецы Міраслаў Лайчак падаў у адстаўку пасьля выкрыцьця ягоных сувязяў з Эпштэйнам, пра гэта заявіў прэм’ер-міністар краіны Робэрт Фіца.
Лайчак абменьваўся тэкставымі паведамленьнямі пра жанчын з Эпштэйнам у 2018 годзе ў час свайго другога тэрміну на пасадзе міністра замежных спраў, пісала BBC.
Абвяшчаючы аб адстаўцы Лайчака ў Facebook, Фіца заявіў, што ўрад губляе «неймаверную крыніцу досьведу і ведаў у замежнай палітыцы», дадаўшы, што былы міністар «катэгарычна адмаўляў і адкідаў» абвінавачваньні, высунутыя супраць яго.
Кіраўнік аргкамітэту Алімпіяды ў Лос-Анджэлесе
Кэйсі Васэрман у суботу папрасіў прабачэньня пасля таго, як у файлах зьявіліся шматгадовыя какетлівыя электронныя лісты паміж ім і былой дзяўчынай Эпштэйна, якая знаходзіцца ў зьняволеньні.
Васэрман, старшыня арганізацыйнага камітэту Алімпійскіх гульняў 2028 году ў Лос-Анджэлесе, заявіў, што яго перапіска ў 2003 годзе з Гісьлен Максвэл, якая адбывае 20-гадовы тэрмін за гандаль непаўналетнімі дзяўчынкамі для Эпштэйна, адбылася да таго, як стала вядома пра яе злачынствы.
Былы пасол Вялікай Брытаніі ў ЗША
Пітэр Мандэльсан, якога летась звольнілі з пасады пасла Вялікай Брытаніі ў Вашынгтоне праз сувязі з Эпштэйнам, у нядзелю выйшаў з Лейбарысцкай партыі пасьля таго, як нядаўна апублікаваныя амэрыканскія дакумэнты аднавілі расьсьледаваньне ягонай сувязі са злачынцам.
Банкаўскія запісы, цытаваныя брытанскімі СМІ, сьведчаць пра тое, што Эпштэйн перавёў 75 000 даляраў на рахункі, зьвязаныя з Мандэльсанам, у 2003 і 2004 гадах. Ён заявіў BBC, што ня мае ніякіх запісаў і не ўспамінаў пра якія-небудзь плацяжы. Абвінавачаньні у лісьце да кіраўніцтва сваёй партыі ён назваў ілжывымі.
Форум