«Цяпер надышоў час, і гэта будзе зроблена!», — напісаў Дональд Трамп.
Шэраг СМІ, у тым ліку PBS і агенцтва Bloomberg, пішуць, што Трамп накіраваў прэм’ер-міністру Нарвэгіі Юнасу Стэрэ ліст, у якім паведаміў, што ЗША больш ня будуць канцэнтравацца толькі на намаганьнях дасягнуць міру, але зьвернуць увагу на свае нацыянальныя інтарэсы.
У лісьце, які ня быў апублікаваныі і які цытуюць выданьні, адзначаецца, што гэта зьвязана ў тым ліку і з тым, што Трампа не ўзнагародзілі Нобэлеўскай прэміяй міру за яго міратворчыя намаганьні. Прэзыдэнт ЗША ў лісьце таксама напісаў аб прэтэнзіях на Грэнляндыю і паставіў пад сумнеў сувэрэнітэт Даніі над востравам.
«Сьвет ня будзе ў бясьпецы, пакуль ЗША не атрымаюць поўнага кантролю над Грэнляндыяй», — працытавалі СМІ.
Прэм’ер Нарвэгіі пацьвердзіў факт атрыманьня ліста ад Трампа і адзначыў, што ня раз тлумачыў прэзыдэнту ЗША, што нарвэскія ўлады не адказваюць за прысуджэньне Нобэлеўскіх прэміяў міру.
17 студзеня Дональд Трамп абвесьціў свой плян увесьці мыта ў памеры 10% на ўсе тавары, якія ў ЗША пастаўляюць Данія, Нарвэгія, Швэцыя, Францыя, Нямеччына, Вялікая Брытанія, Нідэрлянды і Фінляндыя. З 1 чэрвеня мыта павялічыцца да 25%. Ён дадаў, што «гэтае мыта будзе спаганяцца да таго часу, пакуль ня будзе пагадненьня аб поўным і абсалютным набыцьці Грэнляндыі».
Лідэры Даніі і Грэнляндыі заявілі, што «Грэнляндыя не прадаецца» і лёс вострава не павінны вырашаць ЗША. Яны таксама зьняпраўджваюць сьцьвярджэньне Трампа, што востраву пагражае небясьпека пераходу пад кантроль Расеі або Кітаю.
Эўрапейскія лідэры 18 студзеня раскрытыкавалі заявы Трампа аб мытах. У супольнай заяве Вялікай Брытаніі, Даніі, Францыі, Нямеччыны, Нідэрляндаў, Нарвэгіі, Фінляндыі і Швэцыі адзначаецца, што заявы стварылі пагрозу трансатлянтычным дачыненьням, а кіраўнік МЗС Даніі дадаў, што гэта пагражае і адзінству NATO. Генэральны сакратар Паўночнаатлянтычнага альянсу заявіў, што спадзяецца на сустрэчу з прэзыдэнтам ЗША на гэтым тыдні на саміце ў Давосе.
Лідэры Эўразьвязу пасьля сустрэчы сваіх амбасадараў 18 студзеня дамовіліся неўзабаве правесьці саміт у пытаньні Грэнляндыі, каб абмеркаваць крокі ў адказ на павелічэньне мыта з боку ЗША.
Прэсавы сакратар Крамля Дзьмітрый Пяскоў 19 студзеня заявіў, што, калі Трамп вырашыць пытаньне далучэньня Грэнляндыі, ён, безумоўна, увойдзе ў гісторыю. «Прычым ня толькі ў гісторыю Злучаных Штатаў, а і ва ўсясьветную». Пытаньне аб плянах Расеі датычна Даніі і Грэнляндыі Пяскоў пакінуў без камэнтара.
Трамп ня раз заяўляў аб сваім жаданьні атрымаць кантроль над Грэнляндыяй. Упершыню ён агучыў гэтую ідэю ў 2019 годзе, калі ўпершыню заняў пасаду прэзыдэнта ЗША. Ён сьцьвярджаў, што Грэнляндыя жыцьцёва важная для амэрыканскіх вайскоўцаў, што Данія недастаткова зрабіла для яе абароны.
Форум