Як паведаміла агенцтва Reuters, удзельнікі акцыі выгуквалі «Грэнляндыя не прадаецца» і трымалі транспаранты з надпісамі «Рукі прэч ад Грэнляндыі» «Салідарнасьць!», а таксама сьцягі вострава.
Акцыі праходзяць на тле новых пагроз Дональда Трампа ўвесьці дадатковае мыта супраць краін, якія выступаюць супраць амэрыканскага кантролю над Грэнляндыяй.
У Капэнгагене знаходзіцца дэлегацыя ЗША, якая прыбыла ў краіну для сустрэчы зь лідэрамі Даніі і Грэнляндыі. Кіраўнік дэлегацыі сэнатар Крыс Кунс заявіў на прэсавай канфэрэнцыі, што ЗША паважаюць Данію і NATO «за ўсё, што зрабілі разам».
«Я спадзяюся, што народ Дацкага каралеўства не адмовіцца ад сваёй веры ў амэрыканскі народ», — сказаў Кунс.
Дональд Трамп неаднаразова заяўляў аб сваім жаданьні атрымаць кантроль над Грэнляндыяй. Упершыню ён выказаў гэтую ідэю ў 2019 годзе ў часе сваёй першай прэзыдэнцкай кадэнцыі. Трамп сьцьвярджаў, што Грэнляндыя жыцьцёва важная для амэрыканскіх вайскоўцаў, і што Данія не зрабіла дастаткова для яе абароны.
Грэнляндыя — найбольшы ў сьвеце востраў з насельніцтвам усяго 57 тысяч чалавек. Тэрыторыя не зьяўляецца незалежным сябрам NATO, але знаходзіцца пад абаронай Даніі, якая ўваходзіць у складу альянсу.
Форум