Прэм’ер Канады ў Кіеве заявіў пра дапамогу Ўкраіне зброяй і фінансамі

Прэмʼер-міністар Канады Марк Карні
Прэмʼер-міністар Канады Марк Карні

Прэмʼер-міністар Канады Марк Карні прыбыў з візытам у Кіеў на знак падтрымкі Ўкраіны ў яе Дзень незалежнасьці

Канада забясьпечыць Украіну зброяй на суму 2 мільярды канадзкіх даляраў (каля 1,5 мільярда даляраў ЗША), заявіў прэмʼер-міністар Канады Марк Карні падчас выступу ў Кіеве.

«На саміце G7 у чэрвені Канада абяцала дадаткова выдзеліць 2 мільярды даляраў ваеннай дапамогі. Сёньня я з гонарам абвяшчаю, што 1,44 мільярда з гэтай сумы будуць накіраваныя на ўмацаваньне вашага арсэнала ўзбраеньня — праз пастаўку беспілётнікаў, боепрыпасаў і бронетэхнікі, якія паступяць у наступным месяцы», — сказаў Карні, якога цытуе Ўкраінская служба Радыё Свабода.

Паводле слоў прэмʼер-міністра, Канада выдзеліць дзясяткі мільёнаў даляраў на экстраную дапамогу, стварэньне бамбасховішчаў, а таксама на супрацьдзеяньне кібэратакам.

«Як сустаршыня міжнароднай кааліцыі па вяртаньні ўкраінскіх дзяцей, Канада ўмацуе супрацоўніцтва з Украінай, эўрапейскімі партнэрамі і Злучанымі Штатамі, каб забясьпечыць неадкладнае і безумоўнае вяртаньне дзяцей», — дадаў Карні.

Дзень незалежнасьці ў Кіеве, 24 жніўня 2025
Дзень незалежнасьці ў Кіеве, 24 жніўня 2025

У Дзень Незалежнасьці ў Кіеў прыбыў таксама спэцыяльны прадстаўнік прэзыдэнта ЗША па Ўкраіне Кіт Келаг. Ён прысутнічаў на сьвяткаваньні Дня Незалежнасьці ў цэнтры Кіева, дзе выступіў з прамовай прэзыдэнт Уладзімір Зяленскі.

Акрамя таго, разам з Келлагам у мерапрыемстве прынялі ўдзел прадстаўнікі іншых краін, у тым ліку прэмʼер-міністар Канады Марк Карні.

24 жніўня Ўкраіна адзначае 34-ю гадавіну абвяшчэньня незалежнасьці. Сьвята ўстаноўленае ў гонар прыняцьця Вярхоўнай Радай Украінскай ССР 24 жніўня 1991 года Акта абвяшчэньня незалежнасьці Ўкраіны — палітычнага і прававога дакумэнта, які замацаваў новы статус дзяржавы.

Гэты статус быў канчаткова замацаваны ўсеўкраінскім рэфэрэндумам 1 сьнежня 1991 года, калі 90,32% грамадзян падтрымалі незалежнасьць.

​
XS
SM
MD
LG