Пажар на нафтабазе ў расейскім Энгельсе патушылі толькі на шосты дзень

Губэрнатар Саратаўскай вобласьці Расеі Раман Бусаргін заявіў, што ноччу 13 студзеня на нафтабазе ў Энгельсе, якая ўжо амаль тыдзень гарэла пасьля налёту бесьпілётнікаў, «зьліквідавалі адкрытае гарэньне».

«На прамысловым прадпрыемстве ў Энгельсе ноччу ўдалося дабіцца ліквідацыі адкрытага гарэньня», — гаворыцца ў паведамленьні кіраўніка расейскага рэгіёну. Бусаргін удакладніў пры гэтым, што «праца працягваецца».

Днём раней губэрнатар Саратаўскай вобласьці паведаміў, што «на прамысловым прадпрыемстве» ў Энгельсе працягваецца працэс «кантраляванага выгараньня паліва».

Расейскі тэлеграм-канал Astra пісаў, што загарэлася нафтабаза камбінату «Кристалл» арганізацыі «Росрезерв» — фэдэральнай казённай установы, на якую ўскладзеныя абавязкі захоўваць паліва для авіябазы «Энгельс-2». Пазьней гэтую інфармацыю пацьвердзілі ў Генэральным штабе УСУ:

«У раёне цэлі фіксаваліся шматлікія выбухі, узьняўся маштабны пажар», — гаварылася ў паведамленьні.

Пры ліквідацыі пажару загінулі два супрацоўнікі пажарнай службы МНС, яшчэ адзін дастаўлены ў лякарню. У горадзе ўводзілі рэжым НС.

Мясцовыя жыхары некалькі дзён скардзіліся на смог і на тое, што іхныя скаргі выдаляюць з камэнтароў пад допісамі губэрнатара. Бусаргін сьцьвярджаў, што ў паветры не было знойдзена ніякіх забруджваньняў.

ГЛЯДЗІЦЕ ТАКСАМА:

Украіна бесьпілётнікамі атакавала расейскую нафтабазу стратэгічнай авіяцыі ў Энгельсе