«Мы лічым важным, каб Сьвятлана Ціханоўская палітычна падтрымала сам працэс выбараў у Каардынацыйную раду, паколькі гэта важная менавіта палітычная падзея», — заявіў у камэнтары «Позірку» намесьнік кіраўніцы Аб’яднанага пераходнага кабінэту (АПК), кіраўнік Народнага антыкрызіснага ўпраўленьня Павал Латушка.
Нагадаем, Латушка ўзначальвае адну групаў, што балятуюцца ў Каардынацыйную раду.
Такім чынам палітык пракамэнтаваў апублікаваны 16 траўня сумесны зварот шэрагу актараў, якія ўдзельнічаюць у выбарах у КР, і адказаў на пытаньне, ці лічаць яны недастатковай увагу дэмакратычнай лідэркі да гэтага працэсу.
Паводле слоў Латушкі, яе заяву пра падтрымку і заклік галасаваць на выбарах «чакаюць як многія кандыдаты ў сябры КР, „якія ўжо ўсе трапілі пад рэпрэсіі рэжыму“, так і „актыўная частка беларускага грамадзтва, якая выступае за ўмацаваньне трох інстытутаў“» — прэзыдэнта-электа, АПК і КР.
Пры гэтым Латушка падкрэсьліў, што на сустрэчы з прадстаўнікамі беларускай дыяспары ў Познані 16 траўня «такія словы ўжо прагучалі з боку Сьвятланы Ціханоўскай».
Выбары ў трэцяе скліканьне КР пройдуць 25–27 траўня.
Форум