У выніку атакі ў Ізраілі загінулі каля 1400 чалавек. Акрамя гэтага, 229 чалавек знаходзяцца ў закладніках у баевікоў ХАМАС. Паводле зьвестак падкантрольнага ХАМАС Міністэрства аховы здароўя Газы, у сэктары Газа загінулі больш за 7000 чалавек.
Увечары 27 кастрычніка ізраільскае войска абвясьціла аб «пашырэньні» наземнай апэрацыі ў сэктары Газа. Незадоўга да гэтай аб’явы ў сэктары Газа зьніклі тэлефонная сувязь і інтэрнэт, пачаліся інтэнсіўныя бамбардзіроўкі.
Начныя ўдары па Газе
Армія абароны Ізраілю (ЦАХАЛ) паведаміла, што за ноч з 27 на 28 кастрычніка былі атакаваныя 150 падземных абʼектаў на поўначы сэктару Газа, уключаючы «тэрарыстычныя тунэлі, падземныя баявыя памяшканьні і дадатковую падземную інфраструктуру». Таксама ў паведамленьні ізраільскіх вайскоўцаў гаворыцца аб забойстве некалькіх «тэрарыстаў ХАМАС».
Ізраільскія вайскоўцы сьцьвярджаюць, што забілі камандзіра паветраных сіл ХАМАС Асема Абу Ракаба. У паведамленьні сказана, што ён «адказваў у ХАМАС за БПЛА, парапланы, паветранае выяўленьне і супрацьпаветраную абарону», а таксама прымаў удзел у плянаваньні нападу на Ізраіль 7 кастрычніка.
Выданьне Haaretz піша са спасылкай на жыхароў сэктару Газа, што напады мінулай ноччу былі самымі інтэнсіўнымі за апошнія тры тыдні. Паводле іх, бесьперапынна абстрэльвалі ўсходнія раёны Газы, асабліва паўночны сэктар — ад лягера ўцекачоў Джабалія да Бэт-Лахіі і Бэт-Хануна. Агенцтва Reuters таксама называе атаку Арміі абароны Ізраілю ў ноч з пятніцы на суботу «самай інтэнсіўнай кампаніяй паветраных удараў па сэктары Газа з 7 кастрычніка».
Цяпер невядома, колькі чалавек загінула ў выніку начных удараў, бо няма сувязі з мэдыцынскімі брыгадамі ў Газе.
Ізраільскія танкі ў сэктары Газа
Акрамя гэтага, паводле зьвестак СМІ, у сэктар Газа ўехалі ізраільскія танкі. Пра рух танкаў з боку горада Бейт-Хануна на поўначы сэктару Газа распавёў карэспандэнт тэлеканала Sky News Arabia, пра гэта таксама напісалі тэлеканал Kan і эгіпэцкая газэта Ahram Online.
Прадстаўнік Арміі абароны Ізраілю Нір Дынар пацьвердзіў газэце The New York Times, што танкі і частка ізраільскіх вайскоўцаў увайшлі ў сэктар Газа, але адмовіўся паведаміць, ці зьяўляецца тое, што адбываецца пачаткам наземнага ўварваньня.
«Нашы войскі і танкі знаходзяцца ў сэктары Газа. Яны страляюць і дзейнічаюць. Але нашы войскі і танкі былі ў Газе і ўчора», — заявіў генэрал-маёр Нір Дынар. Хутчэй за ўсё, ён мае на ўвазе рэйды, якія ЦАХАЛ праводзіў апошнія некалькі дзён у Газе.
Раней ХАМАС паведаміў, што вядзе баі з ізраільскім войскам на мяжу Ізраілю і сэктару Газа.
Вайна Ізраілю з ХАМАСам. Асноўнае
- 7 кастрычніка 2023 году Ізраіль зазнаў ракетны ўдар з боку сэктару Газа, а баевікі руху ХАМАС прарваліся на тэрыторыю краіны, забіўшы ня менш за 260 удзельнікаў музычнага фэстывалю і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАС. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хэзбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне аб замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач сэктару Газа зачышчаная ад баевікоў ХАМАС.
«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.
«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША. - Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
- 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
- 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
- 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
- 15 студзеня 2025 году стала вядома пра пагадненьне пра спыненьне агню паміж Ізраілем і ХАМАС, якое павінна пачаць дзейнічаць з 19 студзеня. Ізраільскі бок выпусьціць некалькіх зьняволеных палестынскіх арабаў, а тэрарыстычная групоўка ізраільскіх закладнікаў.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
