Сьпікер Херсонскай абласной вайсковай адміністрацыі Аляксандар Талаконьнікаў заявіў, што пакуль немагчыма назваць дакладную колькасьць людзкіх ахвяр, выкліканых маштабным затапленьнем населеных пунктаў вобласьці пасьля зьнішчэньня Кахоўскай дамбы.
«Вельмі шмат зь левабярэжжа паведамленьняў пра тое, што людзі зьніклі бязь зьвестак. Мы ня можам афіцыйна пацьвердзіць факты гібелі. Але вельмі шмат паведамленьняў, што людзі бачаць праз вокны ў некаторых будынках людзей, якія там ёсьць, якія загінулі. Таму мы чакаем найперш дапамогі міжнароднай супольнасьці, каб яны, магчыма, паспрыялі „зялёнаму калідору“, каб дапамагчы людзям, якія там яшчэ застаюцца, і, магчыма, правесьці эксгумацыю цел, якія там ёсьць», — сказаў Аляксандар Талаконьнікаў у эфіры ўкраінскай службы Радыё Свабода.
Паводле яго, на падкантрольнай Украіне тэрыторыі загінулі 10 грамадзян, 20 атрымалі траўмы, 42 лічацца зьніклымі бязь зьвестак. Апроч таго, законны мэр акупаванага расейцамі горада Алешкі Яўген Рышчук паведаміў, што паводле яго зьвестак, у горадзе загінулі 9 грамадзян.
Вада забруднена, але інфэкцыі не зафіксавана
Міністэрства аховы здароўя Ўкраіны паведаміла, што на 14 чэрвеня ва Ўкраіне не зарэгістравана ніводнага выпадку або падазрэньня на халеру, як аб гэтым паведамлялі напярэдадні некаторыя крыніцы.
Маніторынг рачной і марской вады ў пацярпелых ад затапленьня рэгіёнах — Адэскай, Мікалаеўскай і Херсонскай абласьцях — адбываецца ў 38 пунктах назіраньня.
У той жа час у міністэрстве паведамілі, што ў вадаёмах зафіксавалі значнае перавышэньне мікрабіялягічных паказьнікаў, таму купацца або выкарыстоўваць такую ваду для апрацоўкі харчовых прадуктаў нельга. Мэдыкі таксама паведамілі аб забароне лоўлі і спажываньня рыбы з забруджаных вадаёмаў.
Разам з тым, у міністэрстве падкрэсьлілі, што ў мэдычных установах стварылі дадатковыя месцы на выпадак інфэкцыйных успышак.
Узровень вады зьніжаецца
У штабе ліквідацыі наступстваў зьнішчэньня Кахоўскай дамбы заявілі, што затопленымі на падкантрольнай Украіне тэрыторыі застаюцца 28 населеных пунктаў. Эвакуавалі амаль тры тысячы грамадзян.
Паводле зьвестак кампаніі «Укргідроенерго», Кахоўскае вадасховішча страціла каля 70% аб’ёму вады. Падзеньне ўзроўню вады прагназуюць і далей — кожную гадзіну на 1-10 сантымэтраў. У сувязі з гэтым гідраагрэгаты Дняпроўскай ГЭС вымушаны працаваць з абмежаваньнямі.
Кахоўская ГЭС — ніжняя прыступка Дняпроўскага каскаду электрастанцый. Знаходзіцца ў Херсонскай вобласьці. Яе ўзводзілі шэсьць гадоў, пачынаючы з 1950 году. Цяпер станцыя не вырабляе электраэнэргіі і, адпаведна, не працуе ў складзе ўкраінскай энэргасыстэмы. У 2020 годзе ўрад Украіны ўхваліў рашэньне аб далейшай разбудове станцыі і будаўніцтве Кахоўскай ГЭС-2, але з прычыны вайны рэалізацыя праекту так і не пачалася.
Раней «Укргідроенерго» паведамляла, што Расея стварыла на ГЭС сваю вайсковую базу. Гідраэлектрастанцыя знаходзіцца за 5 км ад Новай Кахоўкі, таксама акупаванай расейцамі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.