Пры ўдары ўкраінскага войска па казармах расейскіх вайскоўцаў у Макееўцы Данецкай вобласьці ў навагоднюю ноч страты расейскага боку з высокай ступеньню верагоднасьці перавысілі 300 чалавек, гаворыцца ў зводцы Мінабароны Вялікай Брытаніі за 28 студзеня.
Большасьць вайскоўцаў, хутчэй за ўсё, загінулі або прапалі бязь вестак, а не параненыя, адзначае ведамства са спасылкай на дадзеныя брытанскай выведкі, і называе «рэдкім крокам» прызнаньне Мінабароны РФ гібелі 89 вайскоўцаў.
«Розьніца паміж колькасьцю стратаў, прызнаных Расеяй, і іх верагоднай сапраўднай агульнай колькасьцю сьведчыць аб шырокай прысутнасьці дэзінфармацыі ў расейскіх публічных паведамленьнях», — адзначаецца ў паведамленьні Мінабароны Вялікай Брытаніі.
Паводле ведамства, звычайна гэта адбываецца ў выніку «спалучэньня наўмыснай хлусьні, санкцыянаванай вышэйшым кіраўніцтвам, і перадачы недакладных справаздач чыноўнікамі рангам ніжэй, якія імкнуцца зьменшыць свае памылкі».
У навагоднюю ноч Ўзброеныя сілы Ўкраіны нанесьлі ўдар па казарме расейскіх вайскоўцаў, якая месьцілася ў будынку ПТВ, у акупаванай Макееўцы Данецкай вобласьці. Мяркуецца, што там раскватаравалі мабілізаваных з Самарскай вобласьці.
Украінскі бок паведамляў, што ў выніку ўдару загінулі некалькі сотняў расейскіх вайскоўцаў і мабілізаваных. Расейскае Міністэрства абароны афіцыйна прызнала толькі 89 загінулых.