Лінкі ўнівэрсальнага доступу

Казахі паставілі ў Бучы «юрту нязломнасьці» для падтрымкі ўкраінцаў, у Расеі абурыліся


«Юрта нязломнасьці» у Бучы, Кіеўская вобласьць, Украіна. 10 студзеня 2023
«Юрта нязломнасьці» у Бучы, Кіеўская вобласьць, Украіна. 10 студзеня 2023

Астана запэўніла Маскву, што ўлады Казахстана ня маюць дачыненьня да «юрты нязломнасьці», якую паставілі ва ўкраінскім горадзе Буча Кіеўскай вобласьці прадстаўнікі казаскай грамады Ўкраіны.

З такой заявай выступіла МЗС Расеі.

«Мы зьвярнулі ўвагу афіцыйных прадстаўнікоў Казахстана на паведамленьні ў інтэрнэце. Нас запэўнілі, што інфармацыя, якая распаўсюджваецца асобнымі СМІ, не адпавядае рэчаіснасьці і ўлады рэспублікі („рэспублікамі“ ў Маскве звычайна называюць дзяржавы, якія ўзьніклі пасьля распаду СССР. — Рэд.) да гэтага не датычныя. У расейскага боку няма прычын не давяраць блізкім партнэрам», — заявіла прэс-сакратар МЗС Расе Марыя Захарава.

У Казахстане стварэньне «юрты нязломнасьці» ў Бучы назвалі «прыватнай ініцыятывай».

«Гэта прыватная ініцыятыва нашых казахстанскіх мэцэнатаў, якія вырашылі дапамагчы ўкраінскаму народу. Амбасада ў гэтым працэсе ня ўдзельнічала. Міністэрства замежных спраў Казахстана ня можа камэнтаваць або забараняць, бо гэта прыватная ініцыятыва», — заявіў прэс-сакратар МЗС Казахстана Айбэк Смадыяраў.

У горадзе Бучы Кіеўскай вобласьці, дзе энергасыстэма балянсуе на мяжы каляпсу з прычыны неаднаразовых нападаў з боку Расеі, прадстаўнікі казаскай грамады Ўкраіны знайшлі спосаб даць мясцовым жыхарам магчымасьць сагрэцца і пакаштаваць традыцыйных казаскіх прысмакаў.

«Юрта нязломнасьці» забясьпечана аўтаномным ацяпленьнем і электрычнасьцю гэтак жа, як і «пункты нязломнасьці», і аказвае тыя ж паслугі тым, хто ў іх мае патрэбу.

Бучанская гарадзкая рада раней паведаміла, што «юрту нязломнасьці» у Бучы адкрылі пры падтрымцы пасольства Казахстану ва Ўкраіне.

Буча стала вядомай у сьвеце пасьля таго, як тут пасьля адступленьня расейскіх акупацыйных войскаў знайшлі шмат целаў забітых мірных жыхароў. Украінскія ўлады і сусьветныя СМІ надалі шмат доказаў, што мірных жыхароў тут катавалі і забівалі расейскія салдаты. Пуцін і Лукашэнка абвяргаюць датычнасьць Расеі да гэтых забойстваў, называюць гэтыя факты інсцэніроўкай.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў.
  • Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка даў інтэрвію расейскай прапагандыстцы Вользе Скабеевай, зь якога вынікала, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 1 жніўня Лукашэнка сказаў, што больш як палова тактычнай ядзернай зброі, якую заплянавана разьмясьціць на беларускай тэрыторыі, ужо «завезена і разгрупавана» па краіне. Ён ня раз заяўляў, што ўжыве ядзерную зброю ў выпадку агрэсіі супраць Беларусі.
  • У чэрвені 2023 году ўкраінскія войскі пачалі контранаступальныя апэрацыі на ўсходзе і поўдні краіны. Расейскія войскі падрыхтавалі добра ўмацаваныя лініі абароны, таму прасоўваньне контранаступу ішло са значнымі стратамі.
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы правялі некалькі масавых абстрэлаў украінскіх гарадоў, у Дніпры, Кіеве, Харкаве і іншых месцах дзясяткі людзей загінулі і атрымалі раненьні. Украінскі бок у адказ абстраляў расейскі Белгарад, некалькі чалавек загінулі.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG