Раней «Известия» са спасылкай на ліст намесьніка міністра абароны Валера Герасімава кіраўніку фракцыі «Справедливая Россия — За правду» Сяргею Міронаву паведамілі, што Мінабароны Расеі падтрымае ўвядзеньне пачатковай вайсковай падрыхтоўкі ў школах і прафтэхвучэльнях. На думку Герасімава, новы прадмет трэба вывучаць на працягу апошніх двух гадоў навучаньня і вылучыць на яго ня менш як 140 гадзін на год.
Міронаў у камэнтары выданьню заявіў, што выкладаць курс пачатковай вайсковай падрыхтоўкі павінны «людзі з баявым вопытам: вэтэраны баявых дзеяньняў, супрацоўнікі сілавых ведамстваў».
«З пачаткам правядзеньня спэцыяльнай ваеннай апэрацыі гэтае пытаньне паўстала асабліва востра. Нават многія добраахвотнікі ня маюць неабходнага вопыту для ўдзелу ў баявых дзеяньнях. Увядзеньне такога прадмета ў школах дасьць магчымасьць правесьці плянамерную падрыхтоўку грамадзян да магчымага супрацьстаяньня з ворагам», — растлумачыў ён.
У гэтым навучальным годзе Мінасьветы РФ увяло ў школах патрыятычны ўрок «Размовы аб важным». У пастанове ведамства сказана, што ўрокі праводзяцца, каб «сфармаваць у школьнікаў любоў да Радзімы, гонар за сваю краіну, патрыятызм». Хоць заняткі не ўваходзяць у школьную праграму, бацькі кажуць, што за адмову ад наведваньня іх дзецям пагражаюць адлічэньнем. Урокі былі ўведзеныя празь некалькі месяцаў пасьля поўнамаштабнага ўварваньня Расеі ва Ўкраіну.
