«Кіраўніцтва Расейскай Фэдэрацыі [на апошняй сустрэчы ў Сочы] спрабавала пераканаць Лукашэнку ўступіць у вайну. Там ёсьць пэўны фармат, які яны яму прапанавалі. Я ня буду яго зараз агучваць. На гэта Лукашэнка ў характэрнай яму... вельмі прыгожа спрабуе „зьпятляць“ з гэтага. То бок ён не адмаўляецца і не пагаджаецца. І робіць насамрэч усё, каб гэтага не адбылося. Ён баіцца гэтага. Ён зробіць усё, каб Беларусь туды не ўступіла», — сказаў Кірыла Буданаў у інтэрвію тэлеканалу «1+1».
Кіраўнік вайсковай выведкі дадаў, што Лукашэнка «зрабіў вельмі шмат зла для Ўкраіны», даўшы тэрыторыю Беларусі для ўварваньня Расеі і для абстрэлаў Украіны.
Кірыла Буданаў ня выключыў, што расейскія войскі могуць зноў увайсьці на тэрыторыю Ўкраіны зь Беларусі, калі атрымаюць дазвол Аляксандра Лукашэнкі. Але, паводле яго, цяпер няма прыкмет гэтага.
«Калі гэта будзе, будзе падрыхтоўка да такога працэсу — мы будзем аб гэтым загадзя ведаць і будзем рабіць адэкватныя захады», — падкрэсьліў ён.
Кіраўнік вайсковай выведкі Ўкраіны перакананы, што цяпер Беларусь знаходзіцца пад большым уплывам Кітаю, чым Расеі.
«Беларусь у значнай, у вельмі значнай ступені цяпер залежыць ад пазыцыі Кітаю, і яны будуць зьвяртацца і пытацца выключна Кітай. Найбліжэйшым часам, мабыць, і ў Расеі перастануць пра нешта запытвацца. Кітай, у адрозьненьне ад Расеі, уплывовая цяпер дзяржава. Расея — гэта выключна залежная ад Кітаю тэрыторыя», — адзначыў Кірыла Буданаў.
Кіраўнік Галоўнага ўпраўленьня выведкі Міністэрства абароны Ўкраіны таксама дадаў, што ўжо 23 лютага мелі інфармацыю аб даце і часу расейскага ўварваньня ва Ўкраіну, а таксама аб тым, што яно будзе ажыцьцяўляцца зь Беларусі.
«Час і фінальную дату пачатку ўварваньня [вызначылі] — гэта было каля 15 гадзін 23 лютага», — паведаміў ён.
Пасьля атрыманьня гэтай інфармацыі, спэцыяльнае падразьдзяленьне выведкі атрымала зброю і было накіравана ў аэрапорт у Гастомель.
«Мы мелі дакладны плян, як гэтая апэрацыя будзе пачынацца, і галоўны элемэнт гэтай апэрацыі быў менавіта Гастомель, каб зрабіць хуткі заход у Кіеў. У прынцыпе, увесь гэты плян і будаваўся на тым, каб не пазьней, чым на трэція суткі падняць расейскі сьцяг над Адміністрацыяй прэзыдэнта», — заявіў Кірыла Буданаў.
Раней прадстаўнікі афіцыйнай улады Ўкраіны заяўлялі, што напад Расеі з тэрыторыі Беларусі быў для іх нечаканым.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.