Лінкі ўнівэрсальнага доступу

Politico: заяўка Ўкраіны на ўступленьне ў NATO стала нечаканасьцю для ЗША


Енс Столтэнберг, 30 верасьня 2022 году
Енс Столтэнберг, 30 верасьня 2022 году

Заява прэзыдэнта Ўкраіны Ўладзіміра Зяленскага аб тым, што Кіеў будзе дамагацца ўступленьня ў NATO па паскоранай працэдуры, стала нечаканасьцю для адміністрацыі прэзыдэнта ЗША Джо Байдэна.

Пра гэта паведамляе выданьне Politico са спасылкай на неназваных па імені прадстаўнікоў адміністрацыі.

Выданьне адзначае, што пытаньне ўступленьня Ўкраіны ў NATO зьяўляецца няпростым для Вашынгтона, бо пяты артыкул Паўночнаатлянтычнай дамовы прадугледжвае ўдзел краін-сябраў NATO ў адбіваньні агрэсіі супраць любога з саюзьнікаў.

Адміністрацыя ЗША падкрэсьлівае, што, нягледзячы на падтрымку Украіны ў розных формах, імкнецца пазьбегнуць вайны з Расеяй.

Дарадца Байдэна па нацыянальнай бясьпецы Джэйк Саліван адзначыў, што зараз ня час займацца гэтым пытаньнем. Ён падкрэсьліў, што ЗША па-ранейшаму падтрымліваюць палітыку адкрытых дзьвярэй NATO, аднак цяпер больш актуальна аказваць Ўкраіне практычную дапамогу для супраціву расейскай агрэсіі.

Сьпікер Палаты прадстаўнікоў Кангрэса ЗША Нэнсі Пэласі заявіла, што Ўкраіна, на яе думку, павінна атрымаць «гарантыі бясьпекі», аднак прама не сказала аб падтрымцы яе ўступленьня ў NATO.

Кангрэсмен-дэмакрат Майк Квіглі, які нядаўна наведаў Кіеў, наўпрост падтрымаў украінскую заяўку, сказаўшы, што мэта NATO якраз і заключаецца ў тым, каб абараняць дэмакратыі ад аўтарытарных рэжымаў.

Зяленскі паведаміў, што Ўкраіна падае заяўку на ўступленьне ў NATO ў паскораным парадку 30 верасьня, неўзабаве пасьля таго, як Пуцін абвясьціў пра анэксію чатырох украінскіх рэгіёнаў, часткова акупаваных Расеяй.

Падтрымку паскоранаму ўступленьню Ўкраіны ў NATO напярэдадні выказалі дзяржавы Балтыі, а таксама Канада. Стрыманую пазыцыю заняла Нямеччына. Каб прыняць краіну ў склад NATO, неабходная згода ўсіх 30 краін Паўночнаатлянтычнага зьвязу. Цяпер ідзе працэдура ўступленьня туды Швэцыі і Фінляндыі.

Недапушчэньне ўступленьня Ўкраіны ў NATO было адным з патрабаваньняў Расеі перад пачаткам вайны. У ходзе перамоваў паміж Масквой і Кіевам у першыя тыдні пасьля расейскага ўварваньня абмяркоўвалася магчымасьць адмовы Ўкраіны ад уступленьня ў саюз у абмен на нейкія гарантыі бясьпекі. Перамовы не прывялі да якога-небудзь выніку.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў.
  • Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка даў інтэрвію расейскай прапагандыстцы Вользе Скабеевай, зь якога вынікала, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 1 жніўня Лукашэнка сказаў, што больш як палова тактычнай ядзернай зброі, якую заплянавана разьмясьціць на беларускай тэрыторыі, ужо «завезена і разгрупавана» па краіне. Ён ня раз заяўляў, што ўжыве ядзерную зброю ў выпадку агрэсіі супраць Беларусі.
  • У чэрвені 2023 году ўкраінскія войскі пачалі контранаступальныя апэрацыі на ўсходзе і поўдні краіны. Расейскія войскі падрыхтавалі добра ўмацаваныя лініі абароны, таму прасоўваньне контранаступу ішло са значнымі стратамі.
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы правялі некалькі масавых абстрэлаў украінскіх гарадоў, у Дніпры, Кіеве, Харкаве і іншых месцах дзясяткі людзей загінулі і атрымалі раненьні. Украінскі бок у адказ абстраляў расейскі Белгарад, некалькі чалавек загінулі.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG