Лінкі ўнівэрсальнага доступу

Эўразьвяз вырашыў адмяніць спрошчаны візавы рэжым для грамадзян Расеі


Кіраўнік зьнешняй палітыкі Эўразьвязу Жузэп Бурэль заявіў, што члены ЭЗ дамовіліся аб прыпыненьні дзеяньня пагадненьня аб візах для грамадзян Расеі, якое спрашчае атрыманьне расейцамі турыстычных віз.

Гэтая мера прынятая ў якасьці санкцыі за несправакаванае ўварваньне Расеі ва Ўкраіну.

Рашэньне, абвешчанае Бурэлем, не адпавядае поўнай забароне на выдачу віз, якога дамагаліся некаторыя краіны 31 жніўня, на другі дзень сустрэчы міністраў замежных спраў ЭЗ у сталіцы Чэхіі.

У канцы лютага дзеяньне візавай дамовы 2007 году, якая палягчае ўезд у ЭЗ для расейцаў, было часткова прыпыненае. Але тое рашэньне не закранула так званых «простых расейцаў», дазволіўшы ім працягваць карыстацца перавагамі спрошчанага візавага рэжыму з Эўразьвязам, такімі як скарачэньне часу чаканьня і выдаткаў, а таксама неабходнасьць прадстаўленьня меншай колькасьці дакумэнтаў пры падачы заявы.

Краіны Балтыі, Польшча і Фінляндыя ўзначалілі рух за больш строгія забароны на выдачу віз расейскім турыстам. Паколькі ЭЗ забараняе паветраныя зносіны на рэйсах з Расеі, большасьць падарожнікаў выкарыстоўваюць свае сухапутныя межы для паездак у іншыя краіны Эўразьвязу, дзе правілы не такія строгія. Пасьля атрыманьня візы ў краіну ЭЗ уладальнік дакумэнта можа свабодна падарожнічаць па Шэнгенскай зоне Эўразьвязу.

Нямеччына і Францыя ўзначалілі іншы бок у дыскусіі, заявіўшы, што абмежаваньне віз для расейцаў было б контрпрадуктыўным, паколькі Эўразьвяз спрабуе змагацца за «сэрцы і розумы» тых расейцаў, якія не падтрымліваюць агрэсію Масквы супраць Украіны.

Кіеў заклікаў блёк забараніць выдачу віз усім расейцам, акрамя палітычных дысыдэнтаў. Міністар замежных спраў Украіны Дзьмітро Кулеба заявіў у інтэрвію Азаттыку 30 жніўня, што «называць гэтую вайну праблемай Пуціна», а не праблемай расейскага грамадзтва, якое ў асноўным падтрымлівае свайго прэзыдэнта, — гэта самападман".

Усе 27 членаў ЭЗ павінны былі пагадзіцца на любую прынятую меру, якая абмяжоўвае выдачу віз.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Ад пачатку паўнамаштабнага ўварваньня ва Ўкраіне загінулі як найменей 34 беларусы, якія змагаюцца за яе незалежнасьць.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • Паводле звестак ААН, у выніку паўнамаштабнай вайны каля 8 мільёнаў жыхароў Украіны сталі ўцекачамі.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • За шэсьць месяцаў вайны Расея змагла акупаваць каля 20% украінскай тэрыторыі. У сакавіку 2022 году плошча акупаваных зямель даходзіла да 30%. Аднак у канцы месяца расейскія войскі адступілі з поўначы Ўкраіны, а таксама з большай часткі Харкаўскай вобласьці. На канец жніўня цалкам акупаванымі былі Крым, Луганская і Херсонская вобласьці. А таксама 50% тэрыторыі Данецкай вобласьці, каля 70% Запароскай, прыкладна 30% Харкаўскай.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў.
  • Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка даў інтэрвію расейскай прапагандыстцы Вользе Скабеевай, зь якога вынікала, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 1 жніўня Лукашэнка сказаў, што больш як палова тактычнай ядзернай зброі, якую заплянавана разьмясьціць на беларускай тэрыторыі, ужо «завезена і разгрупавана» па краіне. Ён ня раз заяўляў, што ўжыве ядзерную зброю ў выпадку агрэсіі супраць Беларусі.
  • У чэрвені 2023 году ўкраінскія войскі пачалі контранаступальныя апэрацыі на ўсходзе і поўдні краіны. Расейскія войскі падрыхтавалі добра ўмацаваныя лініі абароны, таму прасоўваньне контранаступу ішло са значнымі стратамі.
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG