Пасьля выбухаў на складзе пад Джанкоем і авіябазе пад Сімферопалем у Крыме расейскія войскі актывізавалі абстрэлы ўкраінскіх гарадоў. Ужо ў другой палавіне 16 жніўня па ўсёй тэрыторыі Ўкраіны гучалі паветраныя трывогі.
Пад ракеты трапілі ня толькі Харкаўская, Мікалаеўская, Днепрапятроўская, Сумская, Чарнігаўская вобласьці, а і Жытомірская, якую апошні раз расейская авіяцыя абстраляла таксама з тэрыторыі Беларусі ў канцы чэрвеня.
Жытоміршчыну абстралялі расейскія самалёты з паветранай прасторы Беларусі
Паветранае камандаваньне «Цэнтар» удакладніла, што дзьве кіраваныя авіяцыйныя ракеты Х-59 былі выпушчаныя з расейскіх бамбавікоў Су-34, якія на той момант знаходзіліся ў паветранай прасторы Беларусі.
Ракеты пацэлілі ў вайсковы аэрадром у ваколіцах Жытоміра і пашкодзілі ўзьлётна-пасадачную паласу і некалькі аўтамабіляў. Сярод асабовага складу ўкраінскага войска ахвяр няма — усе пасьпелі схавацца.
Напярэдадні сьпікер камандаваньня Паветраных сіл Украіны Юры Ігнат заявіў, што Расея павялічыла колькасьць сваёй авіяцыі ўздоўж межаў Украіны — на розных аэрадромах Беларусі, Расеі і Крыму. У прыватнасьці, паводле яго, каля ўкраінскіх межаў знаходзіцца 360 баявых верталётаў. На пачатку вайны іх было 250.
Галоўнакамандуючы Ўзброенымі сіламі Ўкраіны Валер Залужны ў тэлефоннай размове з начальнікам штабу абароны Ўзброеных сіл Канады Вэйнам Дональдам Эйрам выказаў занепакоенасьць разьмяшчэньнем расейскіх ракетных сыстэм з боку Беларусі, у прыватнасьці на аэрадроме «Зябраўка» ў Гомельскай вобласьці.
Расейскія войскі працягваюць наступ па ўсёй лініі фронту
Паводле Залужнага, расейскія войскі штодзень робяць па 700-800 абстрэлаў украінскіх пазыцый, выкарыстоўваючы ад 40 да 60 тысяч боепрыпасаў.
Найперш Расея намагаецца выціснуць украінскія войскі з Данецкай вобласьці. Найбольш напружаная сытуацыя цяпер на кірунку Аўдзееўка — Пяскі — Мар’інка. Адначасова расейцы працягваюць тэрарызаваць абстрэламі Мікалаеў і Харкаў, а таксама Марганец і Нікапаль у Днепрапятроўскай вобласьці.
Новая атака на Затоку ў Адэскай вобласьці
У ноч на 17 жніўня Расея дзьвюма ракетамі Х-22 з самалётаў Ту-22 атакавала Затоку з акваторыі Чорнага мора. У выніку абстрэлу раненьні атрымалі чатыры мірныя жыхары, пашкоджана 7 будынкаў базы адпачынку і 15 лецішчаў.
У той жа час выведка Міністэрства абароны Вялікай Брытаніі паведаміла, што выбухі ў Крыме 16 жніўня прымусяць Расею перагледзець сытуацыю на поўдні ў сувязі з выбухамі на дзьвюх яе базах у Крыме, які зьяўляецца тылам расейскіх войскаў.
Экспэрты амэрыканскага Інстытуту вывучэньня вайны (ISW) перакананыя, што выбухі каля Джанкою і Гвардзейскага нанесьлі значную шкоду расейскім рэсурсам і сур’ёзна парушылі матэрыяльна-тэхнічнае забесьпячэньне Расеі.
У ISW паведамілі аб адсутнасьці доказаў выкарыстаньня амэрыканскага ўзбраеньня для атак на Крым, але ў выпадку, калі іх зьдзейсьніла Ўкраіна, гэта не пярэчыць яе абавязкам перад замежнымі партнэрамі, бо Крым зьяўляецца ўкраінскай тэрыторыяй.
Ва Ўкраіне пачалі разьвіваць ваенны турызм
Адна з грамадзкіх арганізацый распрацавала новыя турыстычныя туры. Турыстам у суправаджэньні прафэсійнага гіда прапануюць наведаць Бучу, Ірпень, Барадзянку і Гастомель, якія былі вызваленыя ад расейскай акупацыі і сталі цэнтрам катаваньняў і зьдзекаў з мірных жыхароў.
Цяпер гэтыя гарады найчасьцей наведваюць прадстаўнікі замежных дэлегацый, які прыяжджаюць ва Ўкраіну з афіцыйнымі візытамі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпра, Кіева, Харкава, Адэсы і іншых месцаў. Дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя процілегламу боку тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ карпарацыі «Роснефть» і завод «Лукойла» ў Кстове ў Ніжагародзкай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі думку, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16–18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- У красавіку высьветлілася, што мірныя перамовы пакуль ня маюць посьпеху, а тым часам Украіна заявіла, што ведае імёны 155 кітайскіх наймітаў, якія падпісалі кантракты з Расеяй і пайшлі на вайну. Афіцыйны Пэкін заявіў, што сваіх грамадзянаў на вайну не адпраўляў, а наадварот, раіў жыхарам краіны трымацца падалей ад абодвух бакоў.
- Дзяржаўны ўкраінскі праект «Хачу жыць», які выконвае Каардынацыйны штаб у пытаньнях абыходжаньня з ваеннапалоннымі, у красавіку 2025 году апублікаваў прозьвішчы 742 грамадзян Беларусі, якія з 2023 году ваююць супраць Украіны на баку Расеі, зь іх 96 ужо загінулі.
- 1 чэрвеня на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- Улетку 2025 году прэзыдэнт Злучаных Штатаў Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Дамовіцца пра мірнае пагадненьне ці прынамсі на асабістую сустрэчу прэзыдэнтаў Украіны і Расеі не атрымалася.
- У ноч на 7 верасьня расейскія войскі нанесьлі рэкордны ўдар па Ўкраіне — дзяржаву атакавалі 805 «Шахедаў» і дронаў-імітатараў. Загарэўся будынак ураду ў Кіеве.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
