Лінкі ўнівэрсальнага доступу

Кіраўнік Жытомірскай вобласьці паабяцаў Лукашэнку «апраметнае пекла» ў выпадку новага ўварваньня зь Беларусі


Кіраўнік Жытомірскай абласной дзяржаўнай адміністрацыі Ўкраіны Віталь Бунечка
Кіраўнік Жытомірскай абласной дзяржаўнай адміністрацыі Ўкраіны Віталь Бунечка

«Калісьці вусаты прэзыдэнт, знаходзячыся ў памяшканьні абласной адміністрацыі, сказаў, што з тэрыторыі Беларусі ва Ўкраіну могуць заехаць толькі трактары, але мы бачылі і танкі, і вайсковую тэхніку».

Кіраўнік Жытомірскай абласной дзяржаўнай адміністрацыі Віталь Бунечка заявіў, што ад пачатку расейскага ўварваньня з тэрыторыі Беларусі былі акупаваныя 9 населеных пунктаў вобласьці, а абстрэлы рэгіёну ажыцьцяўляліся як з Касьпійскага мора, так і вайсковай авіяцыяй, якая дысьлякавалася на тэрыторыі Беларусі.

«Цяпер наша вобласьць цалкам мабілізаваная. Праца ажыцьцяўляецца штодзённа. Прэзыдэнт, так званы, суседняй дзяржавы сказаў аб колькасьці войскаў, якія знаходзяцца ўздоўж мяжы. Я хачу сказаць, што ў рэальнасьці іхныя лічбы не супадаюць з выведнымі дадзенымі. Мы штодзень нарошчваем абароназдольнасьць, і калі нехта захоча зайсьці з тэрыторыі Беларусі па зямлі, то мы зладзім такое апраметнае пекла, што ніхто сюды па зямлі дакладна ня прыйдзе», — сказаў Віталь Бунечка журналістам у часе сваёй паездкі ў Оўруч.

Кіраўнік Жытомірскай вобласьці дадаў пра Лукашэнку:

«Калісьці вусаты прэзыдэнт, знаходзячыся ў нашым будынку, у памяшканьні абласной дзяржаўнай адміністрацыі, сказаў, што з тэрыторыі Беларусі ва Ўкраіну могуць заехаць толькі трактары, але мы бачылі, што заяжджалі і танкі, і вайсковая тэхніка, і залятала зь беларускай тэрыторыі авіяцыя, якая бамбіла і Оўруч, і Малін, і Жытомір».

Віталь Бунечка адзначыў, што да пачатку вайны ва ўмовах кансьпірацыі змаглі вывезьці з Маліна Жытомірскай вобласьці ў бясьпечнае месца банкнотную фабрыку, а таксама сэрвэры дзяржаўнага рэестра судовых рашэньняў. Яны не пацярпелі і працягваюць працаваць у звычайным рэжыме.

У 2019 годзе ў Жытоміры праводзіўся другі Форум рэгіёнаў Беларусі і Ўкраіны. На гэтым мерапрыемстве адбылася першая і адзіная сустрэча Аляксандра Лукашэнкі і прэзыдэнта Ўкраіны Ўладзіміра Зяленскага.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў.
  • Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка даў інтэрвію расейскай прапагандыстцы Вользе Скабеевай, зь якога вынікала, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 1 жніўня Лукашэнка сказаў, што больш як палова тактычнай ядзернай зброі, якую заплянавана разьмясьціць на беларускай тэрыторыі, ужо «завезена і разгрупавана» па краіне. Ён ня раз заяўляў, што ўжыве ядзерную зброю ў выпадку агрэсіі супраць Беларусі.
  • У чэрвені 2023 году ўкраінскія войскі пачалі контранаступальныя апэрацыі на ўсходзе і поўдні краіны. Расейскія войскі падрыхтавалі добра ўмацаваныя лініі абароны, таму прасоўваньне контранаступу ішло са значнымі стратамі.
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы правялі некалькі масавых абстрэлаў украінскіх гарадоў, у Дніпры, Кіеве, Харкаве і іншых месцах дзясяткі людзей загінулі і атрымалі раненьні. Украінскі бок у адказ абстраляў расейскі Белгарад, некалькі чалавек загінулі.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG