Ва Ўкраіне пакаралі расейскага вайскоўца Вадзіма Шышымарына на пажыцьцёвы тэрмін зьняволеньня за забойства бяззбройнага жыхара, паведаміў тэлеканал «Суспільнае».
Саломенскі раённы суд Кіева вынес вырак 21-гадоваму расейскаму вайскоўцу Вадзіму Шышымарыну. Яго пакаралі ў справе аб забойстве 62-гадовага мірнага жыхара Сумшчыны Аляксандра Шаліпава. Трансьляцыя паседжаньня ішла на YouTube-канале судоў Украіны.
На папярэднім судовым пасяджэньні Вадзім Шышымарын прызнаў сваю віну ў інкрымінаваным яму злачынстве і раскаяўся.
Расейцу давалі бясплатнага адваката і перакладчыка. Яго абвінавацілі паводле двух артыкулаў: за забойства і парушэньне законаў і звычаяў вайны.
Камандзір аддзяленьня чацьвёртай танкавай Кантэміраўскай дывізіі Маскоўскай вобласьці, ураджэнец Іркуцку Вадзім Шышымарын абвінавачваецца паводле часткі 2 артыкула 438 Крымінальнага кодэксу Ўкраіны (Парушэньне законаў і звычаяў вайны, спалучанае з наўмысным забойствам).
Расейскі вайсковец 28 лютага 2022 году расстраляў з аўтамата Калашнікава бяззбройнага жыхара паселішча Чупахаўка Сумскай вобласьці, які ішоў уздоўж дарогі і вёў ровар. 62-гадовы пацярпелы загінуў за некалькі дзясяткаў мэтраў ад сваёй хаты.
Шышымарын — камандзір аддзяленьня 4-й танкавай Кантэміраўскай дывізіі з Маскоўскай вобласьці. Прадстаўнік абвінавачаньня прасіў прызнаць расейскага вайскоўца вінаватым паводле часткі 2 артыкулу 438 КК Украіны («Парушэньні законаў і звычаяў вайны») і прызначыць яму максымальнае пакараньне — пажыцьцёвае пазбаўленьне волі.
Судзьдзя зачытаў пратаколы агляду аўтаматаў і іх нумары, у тым ліку нумар аўтамата Шышымарына, і расказаў, што на месцы забойства правялі судовы экспэрымент з удзелам чатырох сьведак. Суд прыйшоў да высновы, што забойства было наўмысным.
Адмова выконваць загад невядомай асобы нічым не пагражала Шышымарыну, таксама ён мог зрабіць выгляд, што страляў і не пацэліў, а паводзіны абвінавачанага на судзе паказвае, што Шышымарын разумеў небясьпеку сваіх дзеяньняў, заявіў суд.
Суд адхіліў паказаньні абвінавачанага і адваката аб тым, што расейскі вайсковец не зьбіраўся забіваць Шаліпава.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў.
- Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка даў інтэрвію расейскай прапагандыстцы Вользе Скабеевай, зь якога вынікала, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 1 жніўня Лукашэнка сказаў, што больш як палова тактычнай ядзернай зброі, якую заплянавана разьмясьціць на беларускай тэрыторыі, ужо «завезена і разгрупавана» па краіне. Ён ня раз заяўляў, што ўжыве ядзерную зброю ў выпадку агрэсіі супраць Беларусі.
- У чэрвені 2023 году ўкраінскія войскі пачалі контранаступальныя апэрацыі на ўсходзе і поўдні краіны. Расейскія войскі падрыхтавалі добра ўмацаваныя лініі абароны, таму прасоўваньне контранаступу ішло са значнымі стратамі.
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы правялі некалькі масавых абстрэлаў украінскіх гарадоў, у Дніпры, Кіеве, Харкаве і іншых месцах дзясяткі людзей загінулі і атрымалі раненьні. Украінскі бок у адказ абстраляў расейскі Белгарад, некалькі чалавек загінулі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.