«Цяжкапараненыя — гэта 53 асобы — эвакуаваныя ў Новаазоўск, дзе ім акажуць мэдычную дапамогу. Гэта тэрыторыя, якая на сёньня часова занятая ворагам і не падкантрольная Ўкраіне. Яшчэ 211 асоб (у здавальняючым стане) даставілі ў Аленеўку — гэта таксама тэрыторыя, непадкантрольная і часова занятая ворагам», — паведаміла Ганна Маляр 17 траўня ў Кіеве на брыфінгу.
Абодва гэтыя гарады знаходзяцца на той частцы тэрыторыі Данецкай вобласьці, якую кантралюе так званая «ДНР».
Ганна Маляр лічыць, што заява расейскіх дэпутатаў аб неабходнасьці забараніць іхны абмен разьлічаная выключна на ўнутраную прапаганду і палітычныя працэсы, што адбываюцца ў Расеі.
Паводле яе, цяпер працягваюцца перамовы аб іхным абмене на расейскіх ваеннапалонных. Ганна Маляр удакладніла, што працэс абмену адбываецца на падставе мэханізмаў Жэнэўскай канвэнцыі і зьяўляецца празрыстым.
Намесьніца міністра абароны Ўкраіны дадала, што камандаваньне ведае дакладную колькасьць украінскіх вайскоўцаў, якія застаюцца на тэрыторыі заводу «Азоўсталь», але адмовілася яе агучыць у мэтах бясьпекі.
Ганна Маляр удакладніла, што Марыюпаль абаранялі полк Ўзброеных сіл Украіны «Азоў», падразьдзяленьні памежнікаў, СБУ, Нацыянальнай паліцыі, Нацыянальный гвардыі, 36-я брыгада марской пяхоты і тэрытарыяльная абарона. У іх складзе таксама ваявалі замежныя грамадзяне, але падкрэсьліла, што такую інфармацыю Міністэрства абароны Ўкраіны можа перадаць толькі абмежаванымі каналамі сувязі або па дыпляматычных каналах, калі дзяржава накіруе афіцыйны запыт. «Гэта вельмі адчувальная інфармацыя, і яна можа быць небясьпечнай для саміх гэтых людзей», — патлумачыла яна.
Намесьніца міністра абароны Ўкраіны заявіла, што марыюпальскі вайсковы гарнізон выканаў баявыя задачы, што дазволіла пазьбегнуць аблогі ўкраінскай арміі на ўсходзе і поўдні, захапіць Запарожжа, а таксама не дазволіла Расеі перакінуць 20 тысяч сваіх салдат на іншыя кірункі.
«Галоўнае, што абарона Марыюпалю дала нам крытычна важны час для стварэньня абаронных рубяжоў і фармаваньня рэзэрву. Цяпер працэс ратаваньня іх працягваецца. Гэта надзвычайна далікатная тэма, і мы ня можам распаўсюджваць інфармацыю пра дэталі, бо любая інфармацыя можа нашкодзіць гэтаму працэсу», — падкрэсьліла намесьніца міністра абароны Ўкраіны Ганна Маляр.
Беларусы ваююць на баку Ўкраіны ў розных злучэньнях. Вядома, што ў баях на «Азоўсталі» удзельнічалі сама меней 5 беларусаў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
