«У інтарэсах захаваньня жыцьця ўчора эвакуавалі 52 цяжкапараненых нашых вайскоўцаў. Пасьля стабілізацыі іхнага стану мы іх абмяняем на расейскіх палонных. Працуем над далейшымі этапамі гуманітарнай апэрацыі», — паведаміла Ірына Верашчук на сваёй старонцы ў Facebook.
Позна ўвечары 16 траўня, калі ўжо вывезьлі з тэрыторыі заводу «Азоўсталь» цяжкапараненых украінскіх вайскоўцаў, прадстаўнікі полку «Азоў» паведамілі, што «абаронцы Марыюпалю выканалі загад, нягледзячы на ўсе цяжкасьці».
«82 дні адцягвалі на сябе сілы праціўніка, якія мелі перавагу, і далі магчымасьць украінскай арміі перагрупавацца, падрыхтаваць больш асабістага складу і атрымаць вялікую колькасьць узбраеньняў ад краін-партнэрак. Ніякая зброя ня будзе працаваць без прафэсійна падрыхтаваных вайскоўцаў, што робіць іх найбольш каштоўным элемэнтам арміі. Дзеля захаваньня жыцьцяў увесь Марыюпальскі гарнізон выконвае зацьверджанае рашэньне вышэйшага вайсковага камандаваньня і спадзяецца на падтрымку ўкраінскага народу», — напісалі прадстаўнікі полку «Азоў» у сваім тэлеграм-канале.
Дарадца Офісу прэзыдэнта Ўкраіны Міхайла Падаляк заклікаў грамадзкасьць і палітыкаў цяпер паменш абмяркоўваць перамовы і ўмовы абмену цяжкапараненых украінскіх вайскоўцаў.
«Што датычыць вызваленьня хлопцаў і абмену, давайце будзем аб гэтым гаварыць вельмі акуратна, каб не зламаць гэты крохкі перамоўны працэс», – заклікаў Міхайла Падаляк.
Як адрэагавалі ў Расеі на вываз параненых украінскіх салдат з «Азоўсталі»
Адразу пасьля зьяўленьня інфармацыі аб вывазе ўкраінскіх параненых з «Азоўсталі» дэпутат Дзяржаўнай Думы Расеі Анатоль Васерман прапанаваў ухваліць на заканадаўчым узроўні рашэньне аб забароне абмену.
У адказ на гэтую ініцыятыву старшыня Дзярждумы Расеі Вячаслаў Валодзін даручыў парлямэнцкаму камітэту абароны падрыхтаваць адпаведнае пратакольнае даручэньне.
«Нацысцкія злачынцы не павінны падлягаць абмену. Гэта ваенныя злачынцы, і мы павінны рабіць усё для таго, каб яна паўсталі перад судом», – заявіў Вячаслаў Валодзін.
У Расеі батальён «Азоў» забаронены як экстрэмісцкая арганізацыя.
Полк «Азоў» уваходзіць у склад Узброеных сіл Украіны і не зьяўляецца прыватнай ваеннай кампаніяй ці ваенізаванай грамадзкай арганізацыяй.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
