Лінкі ўнівэрсальнага доступу

Наступствы санкцый: Беларусь прадае калій больш як у 2 разы таньней за Расею і Канаду


Кампанія «Беларуськалій»
Кампанія «Беларуськалій»

Пасол Беларусі ў Бразыліі Сяргей Лукашэвіч са спасылкай на зьвесткі зьнешняга гандлю Бразыліі (Comexstat) заявіў, што Беларусь у студзені-сакавіку 2022 году прадала Бразыліі 612 тысяч тон калійных угнаеньняў — гэта трэцяе месца пасьля Расеі (каля 659 тысяч тон) і Канады (719 тысяч тон).

«Наша прадукцыя пастаўляецца на самых выгадных умовах: сярэдні кошт калійных угнаеньняў зь Беларусі ў 2022 годзе быў на 60% ніжэйшы, чым угнаеньняў з Расеі і Канады», — сказаў Сяргей Лукашэвіч у інтэрвію бразыльскай газэце «Correio Braziliense», пераклад якой апублікавала Міністэрства замежных спраў Беларусі.

Паводле беларускага дыплямата, замяніць беларускі калій у Бразыліі немагчыма, бо ён складае амаль 20% бразыльскага рынку. Беларускія калійныя ўгнаеньні пастаўляліся ў Бразылію празь літоўскі порт у Клайпедзе, але з 1 лютага Літва спыніла транзыт гэтай прадукцыі. Паводле яго, скарачэньне беларускіх паставак паўплывае на кошт сельгаспрадукцыі і ўгнаеньняў, таму вельмі важна аднавіць продаж беларускіх угнаеньняў на бразыльскі рынак.

«Беларусь грае на зьніжэньне цаны на калійныя ўгнаеньні. Некаторыя краіны абяцаюць дапамагчы з набыцьцём угнаеньняў. Але ёсьць розьніца між закупам тоны за 1 ці за 5 тысяч рэалаў», — тлумачыць Сяргей Лукашэвіч.

Беларускі дыплямат прапанаваў адмовіцца ад пасярэднікаў у пастаўках беларускай прадукцыі.

«Гэтая сытуацыя патрабуе комплекснага рашэньня. Для бразыльскай сельскай гаспадаркі ўяўляецца лягічным захаваць канкурэнтаздольнасьць на гэтым рынку і аднавіць каналы паставак зь Беларусі. Акрамя таго, беларускі ўрад прыняў рашэньне аб лібэралізацыі працэдур экспарту калійных угнаеньняў з 6 красавіка 2022 году. У гэтым кантэксьце эфэктыўным рашэньнем можа стаць прамая сувязь паміж канчатковым спажыўцом у Бразыліі і вытворцам угнаеньняў у Беларусі», — мяркуе ён.

Заходнія санкцыі, а таксама вайна ва Ўкраіне цалкам разбурылі звыклую лягістыку экспартных паставак беларускіх калійных угнаеньняў

Штогод краіна прадавала 10–12 мільёнаў тон угнаеньняў, зарабляючы каля 2,5 мільярда даляраў. Аднак цяпер, хоць ахвотныя купіць гэты тавар ёсьць, яго проста немагчыма даставіць спажыўцам.

Агенцтва Bloomberg паведамляла, што Бразылія шукае шляхі паставак беларускага калію ў абыход санкцый. Бразыльскія імпартэры гатовыя разглядаць варыянты бартэру, выкарыстаньне ў разьліках юаня і пасярэднікаў.

Санкцыі супраць Беларусі за падтрымку расейскай вайны ва Ўкраіне

Аляксандар Лукашэнка прызнаў, што зь Беларусі па ўкраінскай тэрыторыі стралялі ракетамі. Пры гэтым беларускіх вайскоўцаў на ўкраінскую тэрыторыю не адправілі.

Амбасадарка ЗША ў Беларусі Джулі Фішэр у інтэрвію Свабодзе заявіла, што «рэжым Лукашэнкі — саўдзельнік цяперашняга ўварваньня Расеі ва Ўкраіну, бо дазволіў Расеі зрабіць напад зь беларускай тэрыторыі».

26 лютага санкцыі супраць Расеі і Беларусі абвясьцілі Канада і Рада Эўразьвязу. У сьпіс трапілі 20 беларускіх чыноўнікаў і вайскоўцаў. 15 юрыдычных і 8 фізычных асобаў трапілі ў санкцыйны сьпіс ЗША.

28 лютага амбасадары краін Эўразьвязу ўвялі візавыя санкцыі ў дачыненьні 22 беларускіх высокапастаўленых асобаў.

Маладачанская фабрыка «МэбеЛайн» пайшла ў прастой, бо швэдзкая кампанія IKEA згарнула бізнэс у краіне. IKEA шчыльна супрацоўнічала яшчэ з цэлым шэрагам вытворцаў і фабрык, у тым ліку дзяржаўных. Сярод іх дзяржаўны «Менскі мэблевы цэнтар» з Маладэчна, магілёўскі вытворца тэкстылю «Магатэкс», менскі гадзіньнікавы завод «Луч» і іншыя.

У сакавіку Эўразьвяз забараніў экспартаваць прадукцыю дрэваапрацоўкі, вырабленую ў Беларусі ці экспартаваную зь яе. Міністэрства лясной гаспадаркі заявіла, што вымушана скіраваць прадукцыю з Эўропы ў Азію.

Празь цяжкасьці вядзеньня бізнэсу ў рэгіёне ня дзейнічаюць у краіне сэрвісы пошуку жытла на час падарожжаў і выправаў Booking.com і Airbnb.

Дацкая транпартна-лягістычная кампанія Maersk заявіла аб спыненьні перавозак грузаў у Беларусь 4 сакавіка. Пры сыход зь беларускага рынку паведамілі іншыя кампаніі падобнага профілю — DHL і FedEx.

5 сакавіка фінская кампанія OLVI паведаміла пра пачатак згортваньня свайго бізнэсу ў Беларусі, дзе кампаніі належыць «Лідзкае піва». 840 супрацоўнікаў заводу пакуль будуць атрымліваць заробак, спыненьне бізнэсу будзе паступовым.

6 сакавіка наклала санкцыі Рэспубліка Карэя. Там увялі меры экспартнага кантролю для Беларусі, мяркуючы, што яна «істотна спрыяе ўварваньню Расеі ва Ўкраіну».

8 сакавіка санкцыі ўвяла Японія. Актывы фізычных і юрыдычных асобаў, якія трапілі пад новыя абмежаваньні, замарожваюцца. Забараняюцца пастаўкі тавараў двайнога прызначэньня ў Беларусь і экспарт у адрас Міністэрства абароны Беларусі і «Інтэгралу».

Сусьветны банк спыніў усе праграмы ў Беларусі. Банк адзначыў, што ён не ўхваляў новых крэдытаў Беларусі з 2020 году.

Абмежаваньні закранулі спартовую галіну. Зборныя Беларусі розных узростаў адхілілі ад удзелу ў міжнародных турніраў у хакеі, гандболе і баскетболе. Беларускую зборную не дапусьцілі да Паралімпійскіх гульняў — 2022.

Рэйтынгавае агенцтва Fitch, зважаючы на санкцыі, панізіла доўгатэрміновы сувэрэнны крэдытны рэйтынг Беларусі да ССС, што азначае рэальную магчымасьць дэфолту.

Амэрыканская фінансавая кампанія American Express прыпыніла аказаньне паслуг у краіне. Па яе картках цяпер немагчымыя ніякія апэрацыі.

9 сакавіка Эўразьвяз ухваліў адключэньне ад SWIFT трох беларускіх банкаў. Гэта «Белаграпрамбанк», банк «Дабрабыт» і Банк разьвіцьця.

16 красавіка ўведзена поўная забарона на перасячэньне грузавым транспартам Беларусі і Расеі мяжы з ЭЗ. У рашэньні Эўразьвязу, якое апублікавана ў афіцыйным часопісе, сказана, што ЭЗ у адпаведнасьці з уведзенымі санкцыямі забараняе ўвоз і транзыт грузаў аўтатранспартам зь Беларусі і Расеі на тэрыторыю Эўразьвязу.

22 лістапада Канада пашырыла ранейшыя санкцыі. У сьпісы ўключылі дадаткова 22 беларускіх чыноўнікаў, а таксама 16 беларускіх кампаніяў, зьвязаных з ВПК, машынабудаваньнем, фінансавым сэктарам і чыгуначным транспартам. Сярод падсанкцыйных асобаў апынуліся адказныя за перавозкі расейскіх вайскоўцаў і тэхнікі, якая выкарыстоўвалася для ўварваньня ва Ўкраіну. У сьпісе кампаніяў, якія трапілі пад санкцыі, апынуліся беларускія Альфа-Банк і МТБанк. У красавіку 2023 у сьпіс дадалі яшчэ 9 беларускіх банкаў.

28 студзеня 2023 году прэзыдэнт Украіны ўвёў у дзеяньне рашэньне Рады нацыянальнай бясьпекі і абароны аб санкцыях супраць 185 юрыдычных і фізычных асоб, якіх Расея выкарыстоўвае для перавозкі па чыгунцы асабовага складу і вайсковай тэхнікі. У сьпіс трапілі «Беларуськалій», Гомельскі хімічны завод, «Беларуская чыгунка», «Белінтэртранс», «Грузавая служба-Захад», «Лякафарба», «Белгазпрамбанк», «ПЛМ-Інавацыі», «Кронаспан ОСБ», «Беллесэкспарт», «Супрацоўніцтва Транс-Агра», «Рэал-Агент», «Прамагралізінг», «АСБЛізінг», «Транзыт-Аўта-2003», «Ізатэрмічная лягістыка», «Омск-Карбон Магілёў» і іншыя.

20 ліпеня Аўстралія ўнесла ў санкцыйныя сьпісы высокапастаўленых вайскоўцаў Беларусі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG