Лінкі ўнівэрсальнага доступу

Мэркель другі раз пагаварыла з Лукашэнкам, мігранты на мяжы ўкленчылі перад палякамі. Што адбываецца 17 лістапада

17 лістапада мігранты больш не рабілі спробаў прарвацца праз польскую мяжу, але ўкленчылі перад польскім бокам з просьбай пра дапамогу. Ангела Мэркель правяла другую тэлефонную размову з Аляксандрам Лукашэнкам.


Дзеці мігрантаў каля польскага боку мяжы на памежным пераходзе «Кузьніца» 17 лістапада
22:31 17.11.2021

Мэркель пазваніла польскаму прэм'еру і выказала салідарнасьць з Польшчай

Канцлер Нямеччыны Ангела Мэркель патэлефанавала прэмʼер-міністру Польшчы
Матэвушу Маравецкаму. Як паведаміў у Твітэры прэс-сакратар нямецкага ўраду Штэфэн Зайбэрт, «размова ішла аб цеснай нямецка-польскай каардынацыі ў пытаньнях трывожнай сытуацыі на мяжы Беларусі з ЭЗ. Канцлер падкрэсьліла поўную салідарнасьць Нямеччыны з Польшчай».

22:18 17.11.2021

Польскія памежнікі: Мігранты разьбілі новы лягер

Увечары 17 лістапада ў раёне памежнага пераходу «Брузгі» на беларуска-польскай мяжы застаецца каля 1000 мігрантаў. Пра гэта паведаміла польская памежная служба. Паводле польскіх памежнікаў, вялікая група мігрантаў разьбіла новы лягер непадалёк ад пункта пропуску «Брузгі», частка людзей вярнулася ў стары лягер.

19:19 17.11.2021

ЭЗ вылучыць 700 тысячаў эўра на дапамогу мігрантам на беларускай мяжы

Эўразьвяз выдзеліць 700 тысячаў эўра на гуманітарную дапамогу ўразьлівым групам людзей, якія захрасьлі на мяжы Беларусі з краінамі ЭЗ. Пра гэта паведамляецца на сайце Эўракамісіі.

З заяўленай сумы 200 тысячаў накіруюць у Міжнародную фэдэрацыю таварыстваў Чырвонага Крыжа і Чырвонага Паўмесяца. Гэта частка ўнёску ЭЗ у фінансаваньне Фонду дапамогі пры стыхійных бедзтвах, якім кіруе арганізацыя. Сродкі накіруюць, у прыватнасьці, у беларускую фэдэрацыю Чырвонага Крыжа.

Акрамя таго, ЭЗ вядзе перамовы з партнэрскімі гуманітарнымі арганізацыямі для разьмеркаваньня астатніх 500 тысячаў эўра фінансаваньня.

19:18 17.11.2021

Нямецкі бок пацьвердзіў другую размову Мэркель і Лукашэнкі

Зьявілася кароткае паведамленьне на сайце нямецкага ўраду: «У другой тэлефоннай размове з Аляксандрам Лукашэнкам канцлер падкрэсьліла неабходнасьць пры падтрымцы Упраўленьня Вярхоўнага камісара ААН і Міжнароднай арганізацыі міграцыі і ў супрацоўніцтве з Эўракамісіяй забясьпечыць гуманітарную дапамогу і магчымасьці для вяртаньня пацярпелым».

18:20 17.11.2021

«Хутчэй за ўсё, Лукашэнка працягне міграцыйную гульню», — экспэрт

Палітоляг Андрэй Елісееў, дырэктар аналітычнага цэнтру EAST і экспэрт міжнароднай ініцыятывы iSANS, адказвае на пытаньне, ці спыніць Лукашэнка міграцыйную гульню пасьля размовы з Мэркель, разважае пра ролю Крамля і вызначае, якая галоўная мэта афіцыйнага Менску ў мігранцкім крызісе.

17:49 17.11.2021

Мігранты скардзяцца на кепскую ежу і холад. ВІДЭА

Група курдзкіх мігрантаў у Менску прыслала Радыё Свабода відэазварот з заклікам да Эўразьвязу як мага хутчэй знайсьці разьвязаньне сытуацыі на мяжы Беларусі і Польшчы. Адзін зь мігрантаў, кажа, што вярнуўся зь лесу на мяжы і што тыя людзі, якія цяпер знаходзяцца на мяжы — у тым ліку сем’і зь дзецьмі — ня маюць чым сагрэцца, ня маюць нармальнай ежы і іх жыцьцё ў небясьпецы.Паводле яго, мігранты хочуць «пачаць новае жыцьцё» ў Нямеччыне ці Вялікай Брытаніі.

«У нас не было працы, у нас не было будучыні, таму нам давялося пакінуць Курдыстан і паехаць на мяжу, каб адшукаць для сябе новае жыцьцё».

17:45 17.11.2021

Другая тэлефонная размова Лукашэнкі з Мэркель

Дзяржаўнае агенцтва БелТА паведаміла ў сваім Тэлеграм-канале, што пачнуцца перамовы паміж прадстаўнікамі Эўразьвязу і Беларусі пра разьвязаньне сытуацыі зь мігрантамі. Таксама паведамляецца, што Мэркель давяла да Лукашэнкі просьбу старшыні Эўрапейскай камісіі Урзулі фон дэр Ляен пра абавязковы ўдзел у працэсе міжнародных арганізацый, якія займаюцца праблематыкай уцекачоў і мігрантаў.

Пазьней зьявілася кароткае паведамленьне на сайце нямецкага ўраду: «У другой тэлефоннай размове з Аляксандрам Лукашэнкам канцлер падкрэсьліла неабходнасьць пры падтрымцы Упраўленьня Вярхоўнага камісара ААН і Міжнароднай арганізацыі міграцыі і ў супрацоўніцтве з Эўракамісіяй забясьпечыць гуманітарную дапамогу і магчымасьці для вяртаньня пацярпелым».

17:43 17.11.2021

Дзеці каля калючага дроту

Дзеці мігрантаў падыйшлі да плоту і кажуць «I love you, Poland!» (Я люблю цябе, Польшча!) Увесь працэс актыўна здымаецца самімі мігрантамі на мабільныя тэлефоны.

17:36 17.11.2021

Віцэ-міністар замежных справаў Польшчы: «Плян Пуціна і Лукашэнкі праваліўся»

Марцін Пшыдач пдзяліўся зь «Белсатам» думкай, чаму Лукашэнка працягвае эскаляцыю канфлікту. На яго думку, той «зразумеў, што ня здолее зьмяніць палітыку Польшчы і іншых краінаў ЭЗ».

«Таксама і Ўладзімір Пуцін, які падтрымлівае Аляксандра Лукашэнку, зразумеў, што не ўдалося падзяліць Эўрапейскі Зьвяз і NATO. 27 эўрапейскіх дзяржаваў разам стаяць за Польшчай, падтрымліваюць Польшчу і выказваюць салідарнасьць. То бок, паўплываць на палітыку эўрапейскіх краінаў не ўдалося, а мігранты ўжо на беларускім баку, і, я падазраю, беларускія спэцслужбы хочуць як мага хутчэй папросту выпхнуць гэтых людзей і, так бы мовіць, пазбавіцца праблемы, якую рэжым Лукашэнкі сам сабе стварыў».

Пшыдач лічыць, што адзіным разьвязаньнем праблемы застаецца накіраваць мігрантаў назад на Блізкі Ўсход, адкуль яны прыляталі ў Беларусь. Тэлефанаваньне Мэркель Лукашэнку зусім ня сьведчыць пра нейкую «зьмену курсу», паколькі «гэты чалавек выклікае вялікія праблемы ў рэгіёне», аднак супраць яго і паплечнікаў Эўразьвяз, у тым ліку сама Нямеччына, увялі чарговыя санкцыі.

17:30 17.11.2021

Засяленьне мігрантаў у аздараўленчы цэнтар

Каля сотні мігрантаў 17 лістапада засяліліся ў спартова-аздараўленчы цэнтар «Сьвітанак» у Парэччы пад Горадняй. Інфармацыя пра тое, што яго могуць падрыхтаваць для прыёму дзяцей мігрантаў, зьявілася яшчэ 12 лістапада. Hrodna.life атрымаў фота ад аднаго зь мігрантаў. Гэтую інфармацыю пацьвердзілі ў Фэдэрацыі прафсаюзаў Беларусі. У «Сьвітанак» пасялілася 106 чалавек зь лягеру мігрантаў.

16:39 17.11.2021

ЭЗ дае 700 тысяч эўра на дапамогу мігрантам на беларускай мяжы


Эўразьвяз выдзеліць 700 тысяч эўра на гуманітарную дапамогу людзям, якія знаходзяцца на беларуска-польскай мяжы.

«Эўрапейская камісія гатовая даць дадатковае фінансаваньне на гуманітарныя патрэбы, калі доступ гуманітарных партнэрскіх арганізацый у Беларусь палепшыцца ў далейшым», – гаворыцца ў афіцыйным паведамленьні.

15:39 17.11.2021

Мігранты сталі на калені

Група мігрантаў расьцягнулася ўздоўж польскай мяжы і стала на калені. Пасьля ўчорашняга агрэсіўнага штурму з закідваньнем польскай паліцыі камянямі і шумавымі гранатамі сёньняшняя тактыка зусім іншая, яны кажуць «Help-help Poland! Help-help Poland!», просячы прапусьціць іх у Эўразьвяз.

Частка мігрантаў пры гэтым яшчэ застаецца ў лягістычным цэнтры, дзе сьнедае і сьпіць.

15:19 17.11.2021

18 лістапада крызіс на мяжы абмяркуюць Польшча і Вялікая Брытанія

У Варшаве ў чацьвер адбудзецца афіцыйная сустрэча міністра абароны Польшчы Марыюша Блашчака з сакратаром абароны Вялікай Брытаніі Бэнам Уоласам. Палітыкі сустрэнуцца з польскімі вайскоўцамі і правядуць перамовы пра сытуацыю на мяжы зь Беларусьсю. Раней улады як Польшчы, так і Вялікай Брытаніі, якая выйшла з Эўразьвязу, асудзілі рэжым Лукашэнкі і заявілі, што мігранцкі крызіс улады Беларусі ладзяць згодна са складзеным у Маскве плянам.

15:12 17.11.2021

Мігрантам прывезьлі ежу

Улады на вайсковым тарнспарце падвезьлі мігрантам у лягічтычны цэнтар, дзе многія зь іх правялі мінулую ноч, ежу.

13:49 17.11.2021

Беларускія сілавікі са зброяй штурхалі мігрантаў на парушэньне мяжы Літвы

Служба аховы дзяржаўнай мяжы Літвы прадэманстравала відэа, на якім група з 13 нелегальных мігрантаў, якая ў ноч на сераду наблізілася да мяжы Літвы ў Салечніцкім раёне, піша Delfi.

Мігрантаў суправаджалі ўзброеныя беларускія сілавікі. Падобна, яны плянавалі загнаць нелегальных мігрантаў на тэрыторыю Літвы, але ім не далі гэтага зрабіць літоўскія памежнікі.

13:46 17.11.2021

Пракуратура Саколкі пачала сьледзтва

Галоўны інспэктар паліцыі Польшчы Яраслаў Шымчык заявіў Polsat аб тым, што пракуратура Саколкі пачала сьледзтва ў справе штурму польскай мяжы і нападаў на супрацоўнікаў паліцыі. 12 чалавек атрымалі раненьні, зь іх 9 — паліцыянты. Да справы далучылі рэчавыя доказы — прадметы, якія ляцелі з рук мігрантаў у службоўцаў.

Шымчык перакананы, што мігранты дзейнічалі не з уласнай ініцыятывы, а былі падахвочаныя да агрэсіі беларускімі сілавікамі, якія не выпускаюць іх з памежнай паласы і адмыслова рыхтавалі маладых мігрантаў да атак. Больш за тое, Шымчык заявіў, што сярод найбольш агрэсіўна настроеных былі самі беларускія сілавікі. Многія з тых, хто 16 лістапада ладзіў штурм, былі з закрытымі тварамі. Таксама пра актыўны ўдзел беларускіх спэцслужбаў у правакацыях і атаках яскрава сьведчаць шумавыя гранаты, якія відавочна прыйшлі ў рукі мігрантаў ад беларускіх сілавікоў.

13:35 17.11.2021

СК кваліфікаваў дзеяньні польскіх сілавікоў як «злачынства супраць бясьпекі чалавецтва»

Сьледча-апэратыўная група працягвае працу на месцы здарэньня 16 лістапада на тэрыторыі беларуска-польскай мяжы блізу пункту пропуску «Брузгі» і на ім. Сьледчы камітэт завёў справу супраць польскіх сілавікоў, там лічаць іх недапушчальнымі. У Польшчы заяўляюць пра тое, што баранілі сваю мяжу і паказалі рэчы, якімі мігранты, якіх беларускія службы называюць «мірнымі», атакавалі паліцыю ў Брузгах.

13:23 17.11.2021

Польшча пачне будаваць плот на мяжы 15 сьнежня

Пра гэта афіцыйна заявіў сэнатар кіроўнай партыі «Закон і справядлівасьць» Кшыштаф Мруз. Выбар падрадчыкаў на будаўніцтва ўжо завяршаецца. Раней Радыё Свабода пісала, што плот пачала будаваць Літва, а таксама са спасылкай на польскі ўрад паведамляла, якой будзе працягласьць і вышыня агароджы на мяжы з гэтай краінай. За 2021 год польскія памежнікі спынілі звыш 33 тысяч спробаў нелегальнага пераходу мяжы.

12:46 17.11.2021

Польскія сілавікі ў чаканьні абвастрэньняў

Польская паліцыя падрыхтавалася да магчымых новых спробаў атак мігрантаў на беларуска-польскую мяжу. Фота з твітэру МУС Польшчы.

12:40 17.11.2021

Мігранты зноў пачалі рух ля мяжы. ВІДЭА

Памежная варта Польшчы апублікавала відэа, як іншаземцы, якія знаходзяцца на беларускім баку каля памежнага пераходу Брузгі, зьбіраюцца і пакідаюць лягер. Пад наглядам беларускіх службаў яны перамяшчаюцца ў невядомыя месцы.

Загрузіць яшчэ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG