Гэта вынікае з інфармацыі Белстату па выбарачным дасьледаваньні хатніх гаспадарак па ўзроўні жыцьця ў першым паўгодзьдзі 2021 году.
Сярэднедушавы даход — агульны аб’ём даходаў, падзелены на колькасьць насельніцтва. Пры разьліку даходаў на душу насельніцтва ўлічваецца ўсё насельніцтва, у тым ліку беспрацоўныя, пэнсіянэры, непаўналетнія.
Паводле статыстыкі, у першым паўгодзьдзі 2021 году сярэднедушавыя рэсурсы
- да 250 рублёў у месяц мелі 2% беларусаў,
- 250,1 — 400 рублёў мелі 15% беларусаў,
- 400,1 — 500 рублёў — 15,2%,
- 500,1 — 600 рублёў — 16,5%,
- 600,1 — 700 рублёў — 13,9%,
- 700,1 — 800 рублёў — 9,8%,
- 800,1 — 900 рублёў — 7,1%,
- 900,1 — 1 000 рублёў— 5%.
Больш за 1 000 рублёў сярэднедушавых рэсурсаў на месяц мелі 14,9% беларусаў, сярод іх прыкладна «па пяцьсот» (1 200,1 — 1 300 рублёў) мелі на месяц толькі 1,8% насельніцтва, больш за 1300 рублёў — яшчэ 6,4% беларусаў.
Сярэднедушавыя даступныя рэсурсы 4,2% насельніцтва Беларусі не дацягваюць да бюджэту пражытачнага мінімуму, які цяпер складае 283,46 рубля.
Калі ўлічыць, што па дадзеных на 1 студзеня 2021 году насельніцтва Беларусі складала 9 мільёнаў 349,6 тысячы чалавек (больш сьвежыя дадзеныя пакуль не публікаваліся), вынікае, што па-за рысай беднасьці ў Беларусі ў першым паўгодзьдзі 2021 году жылі каля 392,7 тысячы чалавек.
Больш за ўсё тых, хто апынуўся за мяжой беднасьці (у працэнтных суадносінах), у Берасьцейскай вобласьці, — 6,1% ад колькасьці насельніцтва, менш за ўсё — у Менску (1,1%).
