Лінкі ўнівэрсальнага доступу

Улады абяцаюць рост заробкаў, экспэрты чакаюць падзеньня


Ілюстратыўнае фота.

Міністар фінансаў Юры Селіверстаў паабяцаў рост заробкаў у наступным годзе. Глядзім, наколькі гэта рэальна.

У эфіры АНТ міністар фінансаў Юры Селіверстаў паабяцаў рост заробкаў у наступным годзе. Паводле ягонага прагнозу, рост заробкаў будзе «рэальны», то бок апярэдзіць рост інфляцыі.

«Ён будзе мець і рэальнае значэньне, то бок будзе вышэйшы, чым інфляцыя», — сказаў міністар.

Што цяпер з інфляцыяй і ростам заробкаў

Сярэдні заробак у жніўні склаў 1463 рублі. Гэтая сума на 8,5 рубля меншая, чым у ліпені. Тым часам рост цэнаў у Беларусі па стане на верасень склаў 9,8% да паказчыкаў мінулага году.

Намінальны налічаны сярэдні заробак у Беларусі ў жніўні зьнізіўся ў параўнаньні зь ліпеньскім на 0,6%. Рэальны заробак зьнізіўся яшчэ больш — на 0,8%. У Менску сярэдні заробак зьнізіўся на 45,5 рубля, або больш як на 2%. Заробак вырас нязначна толькі ў Віцебскай і Менскай абласьцях.

Ці рэальнае павышэньне заробкаў?

Чыноўнікі абяцаюць «рост заробкаў, які апярэджвае інфляцыю». Так бывае ў штогадовых прагнозах беларускіх чыноўнікаў. Пра гэта кажа фінансавы аналітык «Альпары Эўразія» Вадзім Іосуб.

Вадзім Іосуб.
Вадзім Іосуб.

«Для таго каб расьлі рэальныя заробкі, трэба, каб расла эканоміка. Пры падзеньні эканомікі дасягнуць росту рэальных даходаў — гэта немагчыма. Можна штучна павысіць намінальныя заробкі, але тады вырасьце інфляцыя, і рэальныя даходы зьменшацца», — кажа Вадзім Іосуб.

Беларускія чыноўнікі прагназуюць у наступным годзе рост эканомікі, але «гэта занадта аптымістычна».

«Прынятыя санкцыі яшчэ не пачалі толкам дзейнічаць і не пасьпелі паўплываць на эканоміку. Яны паўплываюць на эканоміку ў канцы году, на пачатку наступнага году. Чакаюцца новыя пакеты санкцый. З улікам санкцый трэба гаварыць аб зьніжэньні эканомікі ў наступным годзе», — кажа Вадзім Іосуб.

Пры гэтым сусьветныя фінансавыя арганізацыі даюць прагноз падзеньня эканомікі ў наступным годзе ад 1% да 3%. З гэтай нагоды Вадзім Іосуб прагназуе «зьніжэньне рэальных даходаў на гэтыя адсоткі».

Напрыклад, Сусьветны банк пагоршыў свой прагноз наконт эканомікі Беларусі ў 2022 годзе. Сьпярша прагназаваўся рост на 1,2%, а цяпер — падзеньне на 2,8%.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG