Пра гэтае рашэньне кіраўнік дзяржавы абвясьціў на пашыраным пасяджэньні кабінэту міністраў, паведамляюць туркмэнскія дзяржаўныя СМІ.
Для Бердымухамедава-малодшага гэта павышэньне: раней ён займаў пасады старшыні Найвышэйшай кантрольнай палаты і быў чальцом Дзяржаўнай рады бясьпекі.
Як мяркуе туркмэнская служба Радыё Свабода, чарговае значнае прасоўваньне 39-гадовага Сердара па кар’ернай лесьвіцы, пэўна, зьвязана з тым, што прэзыдэнт рыхтуе яго да ролі свайго наступніка. У лютым сын Бердымухамедава заняў пасаду старшыні Найвышэйшай кантрольнай палаты Туркмэністану, а таксама спэцыяльна створаную дадатковую пасаду віцэ-прэм’ера ў пытаньнях інавацыяў і дыгіталізацыі. Тады ён быў таксама ўключаны ў склад Дзяржаўнай рады бясьпекі.
Пасьля лютаўскага прызначэньня Сердар Бердымухамедаў прыкметна павысіў свой публічны статус. Ён пачаў узначальваць урадавыя дэлегацыі ў замежных паездках, а яго паездкі па рэгіёнах краіны сталі падобныя на візыты кіраўніка дзяржавы. У красавіку 2021 году Сердар стаў галоўнай дзейнай асобай на сьвяткаваньні Дня ахалтэкінскага скакуна і прымаў падарункі ад імя свайго бацькі-прэыдэнта.
Палітычная кар’ера сына прэзыдэнта Туркмэністану Сердара Бердымухамедава пачалася ў канцы 2016 году, калі ён быў абраны ў парлямэнт Туркмэністану па выніках дадатковых выбараў 20 лістапада 2016 году. З тых часоў грамадзка-палітычная актыўнасьць Сердара Бердымухамедава прыкметна ўзрасла.
У афіцыйных публікацыях сына прэзыдэнта Туркмэністану называлі «сынам народу», а яго публічныя зьяўленьні разам з бацькам — «сымбалем пераемнасьці пакаленьняў».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў